Serik Shápkenov NEET sanatyndaǵy jastardy «erte anyqtaý júıesin» engizýdi usyndy

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda Memleket basshysynyń Parlament Májilisiniń otyrysynda aıtylǵan tapsyrmalaryn qalaı iske asyratynyn málim etti, dep habarlady QazAqparat tilshisi.

Onyń sózinshe, Áleýmettik kodeksti qabyldaý halyqtyń memleket júrgizip otyrǵan ádil áleýmettik saıasatyn túsinýin jaqsartady jáne azamattardyń ómir súrý deńgeıin arttyrady.

«Memleket basshysy Úkimetke «Atameken» UKP-men birlesip, eki aı merzimde halyqtyń tabysyn arttyrý baǵdarlamasyn qabyldaýdy» tapsyrdy. «Halyqtyń tabysyn arttyrý» baǵdarlamasy boıynsha birqatar usynystar bar», - dedi mınıstr.

Ol usynystardyń basynda jalpy tabys pen jumyspen qamtýdy arttyrýǵa baǵyttalǵan bastamalar kózdelgen kórinedi.

«Jeke qoldaý sharalaryn: mamandyq tańdaýǵa, oqýǵa jáne jumysqa ornalasýǵa kómek kórsetý úshin halyqtyń áleýmettik osal toptary men NEET sanatyndaǵy jastardy «erte anyqtaý júıesin» engizý kózdelip otyr. Aqparattyq júıelerdiń kómegimen iske asyrylyp jatqan ulttyq jobalar sheńberinde jumys oryndaryn qurýdy jáne jumysqa ornalastyrýdy baqylaýdy qamtamasyz etý josparlanýda. Jumysqa ornalasýda jastarǵa, ásirese NEET sanatyna basymdyq beriletin bolady», - dedi Serik Shápkenov.

Ekinshiden, «Atameken» UKP-men birlesip, aýyl kásipkerligin damytý boıynsha sharalar kesheni ázirlenýde. Bul sharalar aýyldardyń master-josparlaryn qalyptastyrýdy, kásipkerlikke oqytýdy, ónimder men qyzmetterdi satyp alýǵa kepildik bere otyryp, jeńildetilgen kredıtter men granttardy qamtıtyn bolady», – dedi Serik Shápkenov.

Mınıstr halyqty jumyspen qamtý boıynsha jumys aıasynda jastardyń jumyspen qamtylýyna erekshe kóńil bóletinin atap ótti.

«Qazirgi ýaqytta Mınıstrlik jastardy jumyspen qamtýǵa baǵyttalǵan sharalardy júzege asyrýda – bul «Jastar praktıkasy» jáne «Alǵashqy jumys orny» jobalary. Atalǵan jobalardy kúsheıtý úshin jastardyń qatysý merzimi men jalaqy mólsheri ulǵaıtylady», – dedi Serik Shápkenov.

Sóz sońynda ol turaqty jumys oryndaryn qurý sharttarynyń biri – kásipkerlikti damytý bolyp tabylatynyn atap ótti.

«Memleket basshysynyń tapsyrmasy boıynsha jeke isin damytýǵa arnalǵan grant mólsheri 200-den 400 aılyq eseptik kórsetkishke deıin (612,6 myńnan 1,2 mln teńgege deıin) ulǵaıtylady, sondaı-aq qarjylandyrýǵa úmitker bıznes-jobalardyń ataýlylyǵyn jáne baǵalanýyn kúsheıtý boıynsha sharalar kesheni qabyldanady», – dep túıindedi mınıstr.