Serik Shápkenov: Frılanserler qyzmetin zańnamalyq turǵyda retteý qajet
«Pandemııa men jańa demografııalyq ahýal eńbek naryǵynda júıeli jumysty qajet etetin jańa talaptar qoıýda. Birinshiden, jumys kúshine qoıylatyn talaptardyń tez ózgerýi. Sarapshylardyń pikirinshe aldaǵy 5 jylda jumys kúshine qajetti negizgi daǵdylardyń 40 paıyzy ózgeredi, árbir ekinshi qyzmetkerge qaıta daıarlaýdan ótý qajettigi týyndaıdy. Ekinshiden, demografılyq qaterler. Ónerkásip salasynda kadrlardyń qartaıý protsessi júrip jatyr. Bul salada jastardyń tek 20 paıyzy jumyspen qamtylǵan», - dedi Eńbek mınıstri Úkimet otyrysynda.
Úshinshiden, mınıstr jumystyń jańa formattaryn atap ótti. Qazirgi ýaqytta «erkin tabys ekonomıkasy» nemese gıg-ekonomıka, frılanserler qarqyndy damýda. Olardyń qyzmetin zańnamalyq retteý jáne eńbek quqyqtaryn qorǵaý sharalar qabyldaý qajet.
«Osy rette, mınıstrlik «Kásiptik biliktilik týraly» zań jobasy, «Áleýmettik kodeks» jobasy sheńberinde Ulttyq biliktilik júıesin damytý, jumys kúshin kásiptik oqýdan ótýge yntalandyrý boıynsha birqatar bastamalar qolǵa aldy. Elektrondy eńbek bırjasy negizinde onlaın oqý portalyn damytý, kásiptik baǵdarlaý, ıkemdi jumys formasyndaǵy qyzmetkerlerdi qoldaý boıynsha elektrondy servısterdi qurý boıynsha jumystar atqarylýda», - dedi S. Shápkenov.