Serik Sápıev Golovkınniń kezdesýi jóninde: Mundaı sheshimder boksty kórýge degen nıetińdi qaıtaryp tastaıdy
«Gennadıı Golovkınniń kezdesýin Qaraǵandydaǵy boks ortalyǵynda jankúıerlermen birge tamashaladym. Gena bul kezdesýde 7:5 esebimen jeńdi dep oılaımyn. Menińshe, ol áli de jattyǵý ústinde. Kelesi kezdesýi qashan bolatyny belgisiz. Kelisimge kelgennen keıin bile jatarmyz. Meniń oıymsha, Gena alǵashqy raýndtarda-aq soqqy jasaýǵa kóp mán bergen sekildi. Bári de onyń bir ǵana soqqy jasaýdy kózdegenin kórip otyr. Al Alvares bul ýaqytta jeńil ári shapshań soqqylardy jasap júrdi. Menińshe, Genanyń sol kezde de jeńil soqqylardy jibere berýi kerek edi. Nokaýtqa túsirer soqqynyń reti ózi-aq keler edi», - deıdi Serik Sápıev.
Serik Sápıev óz sózinde alǵashqy raýndtan keıin-aq aıqastyń kúrdeli ótetinin túsingenin aıtady.
«Alvarestiń bul aıqasqa óte jaqsy daıyndalǵany kórinip tur. Menińshe, Gena kelesi aıqasqa budan da myqty daıyndalady. Óıtkeni, soqqyǵa ǵana senbeı judyryqtasýǵa basa mańyz beredi dep oılaımyn. Menińshe, Gena kelesi kezdesýdi odan da myqty ótkizedi degen oıdamyn. Ol jaqta jattyqtyrýshy qansha aıtqanmen tájirıbeli. Qaı jerde qalaı judyryqtasý kerektigine keńes beredi. Tóreshiler boıynsha aıtarym, mundaı sheshimder boksqa degen qyzyǵýshylyǵyńdy tómendetedi. Álbette, tóreshiler qatelesti deıtindeı kóptegen faktorlar bar. Bul adamı faktor. Bálkim, bireýlerge bul sheshim paıdaly shyǵar. Ár adam qatelesýi múmkin. Bul tek boksqa ǵana emes, sporttyń ózge de túrlerinde de kezdesedi. Sheshim kóbinese tóreshilerge emes, jankúıerlerge qatty áser etedi. Máselen, Pekınde jeńilgen kezde maǵan da psıhologııalyq turǵydan aýyr boldy. Jattyǵasyń, sol kezdesýdi eske alasyń. Biraq, ýaqyt óte kele jańa chempıonattar bastalǵan ýaqytta ol týraly umytyp ketesiń. Gena úshin bul sheshim sonshalyqty jaısyz dep aıtpaımyn. Ol utty. Jankúıerleri arta tústi. Áleýmettik jelidegi boks juldyzdary da Genanyń jeńgenin jazyp jatyr», - dedi Serik Sápıev.
Eske sala ketsek, WBA (Super), WBC, IBF men IBO tujyrymdary boıynsha álem chempıony Gennadıı Golovkın (37-0, 33 KO) kópten kútken jekpe-jegin ótkizdi. AQSh-tyń Las-Vegas qalasynda uıymdastyrylǵan boks keshinde Triple G meksıkalyq bokstyń jaryq juldyzy - Saýl «Kanelo» Alvarespen (49-1-1, 34 KO) judyryqtasyp, teń túsken bolatyn.