Serik Qojanııazov: Bıyl Syrdarııanyń sýy Kóksaraıǵa jetpeıtin túri bar
«Syrdarııa ózeniniń sýy mol jyldarda Toqtaǵul sý qoımasy tolyp ketetin. Bul – ózenniń eń joǵarǵy bóliginde ornalasqan sý qoımasy. Onyń syıymdylyǵy – 19,5 mlrd tekshe metr. Jazda ekologııalyq jaǵdaı qalypty bolýy úshin sáýir aıyna qaraı osy qoımaǵa 15 mlrd tekshe metr sý jınalýy kerek. Ókinishke qaraı, keıingi 4 jyl ishinde Toqtaǵul qoımasyna munsha sý jınalmaı jatyr. Ázirge kóńil kónshıtindeı jaǵdaı joq. Aqpan aıynda qardyń qalaı bolatynyn bilmeımiz», - degen mınıstrlik ókili Ózekbstan, Qyrǵyzstan jáne Qazaqstan arasynda keńes zamanyndaǵy kelisim qaıta kúshine enip, jaǵdaıdy retteýge múmkindik týǵanyn eske saldy. Biraq aımaqtaǵy qurǵaq tsıkl ol kelisimniń de múmkindigin shektep otyr.
«Byltyr Toqtaǵuldyń sýyn ózara tıimdi paıdalaný úshin Qazaqstan men Ózbekstan aldaǵy úsh jyldyń qysynda qyrǵyz tarapyna elektr qýatyn berip turýǵa kelisken. Aqysyna olar jazda bizge qajetti sý berýi kerek. Osyndaı aıyrbas kestesi boıynsha jumys istegenbiz», - dedi mınıstrdiń orynbasary.
Serik Qojanııazovtyń aıtýynsha, Qazaqstan tarapy bıyl da sol kelisimniń múltiksiz oryndalýyna kúsh salyp otyr.
«Biz qyrǵyz tarapymen kelistik. Jyl sońyna deıin jetkizip úlgermegen elektr qýatyn, bıyl birinshi toqsannyń sońyna deıin jetkizbekpiz. Sol boıynsha jumys júrip jatyr. Syrdarııanyń sýly bolýy Toqtaǵul qoımasyna baılanysty. Ókinishke qaraı, etektegi, Aral mańyndaǵy jaǵdaı aıtarlyqtaı jaqsara qoıǵan joq. Tipti Kóksaraı qarymta rettegishine qajetti sýdy da jınaı almaımyz ba degen qorqynysh bar. Shardarada ǵana sý bolatyn shyǵar. Bıyl da jaǵdaı qıyn bolady. Óıtkeni jazǵy vegetatsııa kezeńin Kóksaraısyz ótkeretin sııaqtymyz», - dedi vıtse-mınıstr.