Serik Qojanııazov: Balqashqa Aral taǵdyryn qaıtalaý qaýpi tónip turǵan joq

NUR-SULTAN. QazAqparat – Ekologııa, geologııa jáne tabıǵı resýrstar vıtse-mınıstri Serik Qojanııazov belgili sarapshy, sý salasynyń mamany Málik Bórlibaevtyń Balqash kóliniń taǵdyry týraly málimdemesine pikir bildirdi, dep habarlaıdy QazAqparat tilshisi.

Vıtse-mınıstrdiń sózine qaraǵanda, Balqash kóli ekologııalyq apatqa ushyramaýy úshin jyl saıyn 12 tekshe shaqyrym sý quıylýy kerek. Mamandar kóp jylǵy zertteýler nátıjesinde osyndaı tujyrym jasaǵan.

«Qytaımen kelissózder aıasynda bizdiń eldiń ustanymy sý bólisý kezinde ekojúıeni eskerý kerek degenge saıady. Osyǵan baılanysty Qazaqstan tarapy Balqash kólin Іleniń sýyn negizgi tutynýshy nysan dep kórsetip júr. Kelissózder kezinde Balqashtyń ekologııalyq jaǵdaıy Іleden keletin sýǵa táýeldi ekenin aıtýdyń bir de bir múmkindigin jiberip kórgen joqpyz.

Ǵalymdar ózderiniń kópjylǵy zertteýlerine súıenip, Balqash kóliniń aman turýy úshin Baltyq júıesi boıynsha 341 metr deńgeıde saqtalý kerek dep topshylaıdy. Keıingi 10 jylda kóldiń deńgeıi 340 metrden túspegenin aıtý kerek», - deıdi mınıstrlik ókili.

Sondaı-aq, Dobyn shekaralyq beketindegi gıdrogolııalyq derekterdi taldaý kezinde Іleniń kópjyldyq ortasha aǵyny 2001-2020 jyldar alalyǵynda 13,8 tekshe shaqyrym bolǵanyn málim etti.

«Balqashqa jyl saıyn 12 tekshe shaqyrym sý kelip otyrsa, kóldiń deńgeıi turaqty saqtalýyna kepil bola alady. Qadirli Málik Bórlibaevtyń málimdemesinen keıin bul másele barlyq áleýmettik jelilerde kesheden beri qyzý talqylanyp jatyr. Solarǵa jaýap retinde mynany aıtqym keledi. Joǵaryda ózim keltirgen derekterdi negizge ala otyryp, «Balqashqa Araldyń taǵdyryn qaıtalaý qaýpi tónim turǵan joq» ekenin aıtamyn. Qytaı tarapymen kelissózder kezinde Іleden kiretin sýdyń aǵynyn jylyna 12 tekshe shaqyrymnan kem bolmaý kerek degen naqty ustanym aıtyp kelemiz. Sý budan tómen bolmasa, Balqashqa qurý qaýpi tónbeıdi», - dedi mınıstrdiń orynbasary.

Serik Qojanııazov Qytaı tarapy da óziniń shekarasynyń mańynda ekologııalyq apat bolǵanyn qalamaıdy degen boljam aıtty.

«Bulaı deýime birlesken komıssııanyń 17-otyrysynda Qytaı tarapynyń kelisim jobasyn talqylaı kelip, eki jaqtaǵy ekojúıeni damytý jáne saqtaý týraly usynystarǵa kelisti. Bul Balqash kóliniń ekologııasy úshin mańyzdy», - dedi vıtse-mınıstr.