Serik Aqsuńqaruly, aqyn: Ereýilshiler men sodyrlardy shatastyryp almaý kerek

NUR-SULTAN. QazAqparat – Elimizdiń barlyq derlik óńirlerindegi, ásirese Almatydaǵy jaǵdaı jaǵany ustatty. Qazir jaǵdaı turaqtalǵan sekildi. Degenmen, osy oqıǵalarǵa qatysty is-sharalar barysynda shuǵyl áreket etkende ereýilshiler men basbuzar sodyrlardy shatastyryp almaý kerek. Tanymal aqyn, memlekettik syılyqtyń ıegeri Serik Aqsuńqaruly osyndaı pikir bildirdi, dep habarlaıdy QazAqparat.

«Oqıǵa qalaı bastalyp edi? 2 qańtar kúni suıytylǵan gaz baǵasynyń kúrt qymbattaýyna baılanysty Jańaózen qalasynyń turǵyndary ereýilge shyqty. Іle-shala kóptegen óńirler ereýilshilerdi qoldady. Prezıdent Qasym-Jomart Toqaevtyń tapsyrmasymen QR Premer-Mınıstriniń orynbasary Eraly Toǵjanovtyń basshylyǵynda memlekettik komıssııa qurylyp, ol komıssııa Mańǵystaýda jergilikti belsendilermen kelissóz barysynda ymyraǵa keldi. Suıytylǵan gaz baǵasy 50 teńgege deıin tómendetildi. Osylaısha, ereýilshiler talabyn Prezıdent qoldady. Másele osymen bitýi tıis edi, alaıda Almaty, Taraz, Shymkent qalalary men taǵy basqa da óńirlerde beıbit sherý aıaǵy sodyrlyq áreket pen arandatýǵa ulasyp ketti», - deıdi S. Aqsuńqaruly.

Onyń aıtýynsha, Prezıdenttiń pármendi sheshiminiń arqasynda ǵana terrorızmmen kúres belsendi eńserilip jatyr. «Eldigimizdiń irgesin shaıqaltýǵa tyrysqandardy aıamaı jazalaý kerek. Mundaı sátte búkil zaıyrly memleketter óz halqyn, elin qarýmen qorǵaıdy. Osy rette, Memleket basshysynyń Ujymdyq qaýipsizdik týraly shart uıymynan kómek suraǵanyn durys dep esepteımin. Terrorızmmen kúres bir ǵana memlekettiń isi emes, álem elderiniń ortaq máselesi. Elimiz jýyq arada bul qıyndyqtardy jeńedi dep oılaımyn. Degenmen, nazar aýdaratyn bir másele: ásirese shuǵyl áreket etý, keıinnen baǵa berý nemese jazalaý sáti kelgende ereýilshiler men sodyrlardy shatastyrmaý kerek», deıdi S.Aqsuńqaruly.