Sergeı Arhıpov órt kezinde qaza bolǵandar tizimine qosyla ma - mınıstr jaýaby

ASTANA. QazAqparat – Eńbek jáne halyqty áleýmettik qorǵaý mınıstri Tamara Dúısenova Abaı oblysyndaǵy órt saldarynan qaza bolǵandardyń tizimine traktorshy Sergeı Arhıpovty qosýǵa qatysty pikir bildirdi, dep habarlaıdy QazAqparat tilshisi.

Senattyń jalpy otyrysynan keıin tilshiler mınıstrden Abaı oblysynda qyzmettik mindetin atqarý kezinde qaza bolǵan 14 adamnyń qataryna Sergeı Arhıpovty qosý múmkindigi týraly suraq qoıdy.

«Úkimettik komıssııa quryldy. Olar qor jaǵynan qandaı áleýmettik qoldaý kórsetiletinin anyqtaıdy. Onyń (Sergeı Arhıpov) qaıtys bolǵanyn eskere otyryp, asyraýynda qalǵan adamdar bolsa, onda memlekettik áleýmettik járdemaqy jáne saqtandyrý qorynan tólenetin áleýmettik tólemder qarastyrylady. Bul qarajat mindetti túrde tólenedi», - dedi T. Dúısenova.

Onyń aıtýynsha, ony qyzmettik mindetin atqarý kezinde qaza tapqandar tizimine engizý máselesin komıssııa sheshedi.

Sondaı-aq ol mınıstrlik qazir «Semeı ormanyndaǵy» jumys jaǵdaıyn tekserip jatqanyn aıtty.

«Alǵashqy kúnnen bastap bizdiń eńbek ınspektsııamyz sol jerde júr. Atap aıtqanda, bas eńbek ınspektory da atalǵan oblysta eńbek etý jaǵdaıyn tekserip jatyr», - dedi Tamara Dúısenova.

Eske salaıyq, keshe Bas prokýrorynyń orynbasary Jandos Ómirálıev Sergeı Arhıpov Semeı ormanyndaǵy órtten qaza bolǵandardyń tizimine engizilmeıtinin aıtqan bolatyn.

Esterińizge sala ketsek, Instagram-daǵy paraqshalardyń birinde Sergeı Arhıpov Abaı oblysy aýmaǵyndaǵy órtti sóndirýge kómektesý úshin traktorymen shyǵyp ketip, iz-túzsiz ketkeni týraly aqparat taraǵan edi. Ol sońǵy ret 9 maýsym kúni habarǵa shyqqan. Aldymen onyń traktory tabyldy. Keıin, 10 maýsym kúni 36 jastaǵy S.Arhıpovtyń denesi anyqtaldy. Júrgizilgen sot-medıtsınalyq saraptamanyń qorytyndysyna sáıkes er adamnyń ólimi júrek aýrýynan - kardıomıopatııadan bolǵany anyqtaldy.

8 maýsym kúni tutanǵan «Semeı» ormany rezervatyndaǵy órtpen kúreske jumyldyrylǵan 14 ormanshy qaza boldy.

Búgin Tótenshe jaǵdaılar birinshi vıtse-mınıstri Ibragım Kúlshimbaev órt 4-5 kúnde aýyzdyqtalýy múmkin ekenin aıtty.