«Sergektiń» yqpalymen Almatyda jol-kólik oqıǵasynan bolatyn ólim-jitim 40%-ǵa azaıǵan

ALMATY. QazAqparat – «Sergek» kameralary ornatylǵaly beri jol-kólik oqıǵalarynan qaza bolǵandar sany 40%-ǵa (2019 jylǵy 161-den 2022 jyly 96-ǵa deıin) qysqardy. Bul týraly óńirlik kommýnıkatsııalar qyzmetinde ótken brıfıngide «Kórkem Telekom» JShS bıznesti damytý jónindegi dırektory Arman Álmerekov aıtty, dep habarlaıdy QazAqparat.

Almaty qalasy ákimdigi, Polıtsııa departamenti jáne «Kórkem Telekom» JShS arasynda memlekettik-jekemenshik áriptestik kelisimi aıasynda «Almaty qalasynyń zııatkerlik qaýipsizdik júıesi jáne jol qozǵalysy trafıgin taldaý» jobasy júzege asyrylyp jatyr. Qalada 766 «Sergek» apparattyq-baǵdarlamalyq kesheni ornatylǵan, onyń 383-i jelilik ýchaskede, 383-i jol qıylystarynda.

Spıkerler atap ótkendeı, beınebaqylaý júıesi almatylyq júrgizýshiler tártibiniń jaqsarýyna áser etti. Muny jol-kólik oqıǵalarynyń statıstıkasy kórsetip otyr.

«Búkil álem boıynsha júrgizilgen kóptegen zertteýge sáıkes, baqylaý kameralary aýyr jaraqat nemese ólimmen aıaqtalatyn apattardy 11%-dan 44%-ǵa deıin tómendetýge yqpal etedi. Osylaısha, «Sergek» kameralary ornatylǵannan beri jol-kólik oqıǵalarynan qaza tapqandar sany 40 paıyzǵa (2019 jylǵy 161-den 2022 jyly 96-ǵa deıin) azaıdy», - dedi Arman Álmerekov.

Qazirgi ýaqytta taǵy 575 apparattyq-baǵdarlamalyq keshen ornatý josparlanǵan. Bul Almaty joldaryndaǵy ólim-jitimdi jáne 30%-ǵa tómendetýge múmkindik bermek.

«Sergek» keshenderi arnaıy jelilik baqylaý kameralarymen jabdyqtalǵan, ıaǵnı barlyq oqıǵalar beınege túsirilýi arqyly qoǵamdyq qaýipsizdikti baqylaýǵa múmkindik jasalǵan. Qajet bolǵan jaǵdaıda polıtsııa qala kóshelerinde bolǵan qylmystardy ashý úshin osy kameralardy paıdalanady.

Júıe táýlik boıy rejıminde keminde 30 kún derekterdiń saqtalýyn qamtamasyz etedi. 30 kúndik beınesýretterdi saqtaý merzimi Ulttyq qaýipsizdik komıteti tóraǵasynyń buıryǵymen bekitilgen Ulttyq beınebaqylaý júıesiniń jumys isteý qaǵıdalarynda aıqyndalǵan.

Almaty qalasy polıtsııa departamentiniń málimetinshe, 2022 jyly «Sergek» júıesi boıynsha 8,332 mlrd teńgege 1 136 670 quqyq buzýshylyq tirkelse, 2022 jyldyń jeltoqsan aıyndaǵy jaǵdaı boıynsha 997,2 mln teńgege 85 442 quqyq buzýshylyq tirkeldi. Júıe kúnine orta eseppen 3000-nan astam jol erejesin buzý faktisin tirkeıdi.

Aıta ketsek, Almatydan basqa Qazaqstannyń 7 qalasynda «Sergek» júıesi jumys isteıdi: Astana, Óskemen, Atyraý, Shymkent, Túrkistan, Taraz, Semeı.