«Sergek» jobasy 2023 jyldyń sońynda aıaqtalady

NUR-SULTAN. QazAqparat – Nur-Sultan qalalyq máslıhatynyń depýtaty Almat Júnisov elordanyń vıdeofıksatsııa júıesinde oryn alyp otyrǵan problemalardy kóterdi, dep habarlaıdy QazAqparat tilshisi.

«Sergek» foto-vıdeofıksatsııa apparattyq-baǵdarlama keshenin qurý jáne paıdalaný jónindegi memlekettik-jekeshelik áriptestik jobasyn júzege asyrý jol-kólik oqıǵasymen baılanysty ólim-jitimdi, qoǵamdyq oryndardaǵy qylmysty tómendetýge múmkindik berdi. Biraq, ony odan ary belsendi túrde júzege asyrý qajettiligi bar. Turǵyndardan elordanyń turǵyn úı alaptaryna kameralar ornatýǵa qatysty ótinishter kóptep túsip jatyr», - dedi Almat Júnisov qalalyq máslıhat otyrysynda.

Onyń atap ótýinshe, túngi ýaqytta jumys istep turatyn kameralarǵa qatysty problema bar.

«Buǵan qosa, kameralar eń aldymen joldardyń qaýipti ýchaskelerinde, qıylystarda, apat jıi oryn alatyn ýchaskelerde ornatylýy tıis. «Sergek» jobasy boıynsha qoldanystaǵy kelisimshart merziminiń 2023 jyldyń jeltoqsanynda aıaqtalatyndyǵyna baılanysty qural-jabdyqtarǵa túgendeý júrgizý, olardyń boljamdy qyzmet kórsetý merzimin belgileý, jergilikti bıýdjetke aldaǵy ýaqytta qosymsha júktemege jol bermeý maqsatynda tehnıkalyq jaı-kúıin anyqtaý qajet. Sonymen qatar jobanyń aıaqtalatyndyǵyn eskere otyryp, jańa jobany ony keńeıtý ári jańǵyrtý múmkindigimen ázirleý kerek», - dedi depýtat.