«Sergek» monopolızm jáne Qulybaevpen sybaılastyq týraly aıypqa jaýap berdi

<p>ASTANA. KAZINFORM &ndash; Buǵan deıin Telegram-arnalardyń birinde &laquo;Sergek&raquo; jobasyndaǵy monopolııany alyp tastaý talabymen petıtsııa jarııalanǵany týraly málimet taraǵan edi.</p>

Petıtsııa avtorlarynyń jazýynsha, «Sergek» jobasy 2017 jyly Astana qalasynyń burynǵy ákimi Áset Isekeshevtiń bastamasymen iske qosyldy. Jobany júzege asyrý úshin úsh zańdy tulǵa tańdap alynǵan: «Kórkem Telekom» JShS, «Open Technologies Group» JShS, «The One Capital» JShS.

«Alǵashqy eki kompanııa bir adamǵa – Áset Ahmetovke tıesili jáne bir meken jaıda tirkelgen.  Demek, bul QR zańnamasyn buzý sanalady. Óıtkeni, zańǵa sáıkes, eki birdeı affılırlengen jeke seriktesti tańdaý konkýrsyna qatysa almaıdy», - delingen petıtsııada.

Kazinform agenttiginiń resmı saýalyna kompanııa jaýap berip, «Sergektiń» monopolıst emestigin málimdedi.

«Sergek Group jol qaýipsizdigin qamtamasyz etý jónindegi qyzmetter usynatyn salada monopolıst emes jáne bolýy da múmkin emes. Bizdiń bilýimizshe, qazirgi ýaqytta Qazaqstanda Ákimshilik quqyq buzýshylyqtardyń biryńǵaı tiziliminiń protsessıng ortalyǵyna qosylǵan 40-tan astam túrli apparattyq-baǵdarlamalyq keshen (otandyq jáne sheteldik) jumys istep tur», - dep jaýap berdi kompanııadan. 

Sonymen qatar kompanııanyń menshik ıesi bolý múmkin tulǵaǵa qatysty da aqparat bar. 

«Sonymen qatar «Respublica.kz» saıtynyń ınsaıderlik derekterine sáıkes, «Sergek» jobasynyń tasasynda Tımýr Qulybaevtyń uly Altaı Qulybaev tur», - delingen petıtsııa mátininde.

Bul aıyptaýǵa da «Sergek» kompanııasynan jaýap berip, naqyt benefıtsıarlar kim ekenin málimdedi. 

«Sergek Group kompanııalar tobyna túrli kompanııa kiredi. Olardyń qatarynda Qazaqstan ІT-jobalardy júzege asyratyn «Kórkem Telekom», software jáne hardware mamandaryn biriktiretin «Sergek Technologies», sheshimderimizdi eksporttaıtyn «Sergek Projects» jáne basqalary bar. Sergek Group negizin qalaýshy, ıesi jáne basty benefıtsıarlary – qazaqstandyqtar, aǵaıyndy Qaırat pen Áset Ahmetovten. Sonymen qatar sál burynyraq kompanııa Tımýr Týrlovtan ınvestıtsııa tartty. Bul bolashaqta onyń kompanııa aktsıonerleri qataryna qosylýyna múmkindik beredi», - dedi «Sergek» kompanııasynan.