Serbııanyń burynǵy mınıstri vokzal shatyrynyń opyrylýyna baılanysty ustaldy

<p>ASTANA. KAZINFORM &ndash; Serbııanyń Novı-Sad qalasynyń prokýrorlary 15 adam qaza taýyp, narazylyq tolqynyn týdyrǵan temirjol vokzaly shatyrynyń opyrylýyna qatysty 11 adamdy qamaýǵa aldy, dep habarlaıdy<a href="https://www.reuters.com/world/europe/serbia-arrests-11-over-railway-station-roof-collapse-2024-11-21/" target="_blank" rel="noopener"> Reuters.</a></p>

Eske sala ketsek, Serbııa halqy eń kóp shoǵyrlanǵan Novı-Sad qalasyndaǵy temirjol vokzalynda beton shatyr qulap, 14 adam qaza tapty. Zardap shekken taǵy bir adam jeksenbi kúni qaıtys boldy.

Foto: t.me/bbcrussian

El astanasy Belgradta sherýge shyqqan serbter kinálilerdi tabýdy talap etti. Adamdar Novı-Sad qalasyndaǵy qaıǵyly oqıǵaǵa qatysy bar adamdardy qamaýǵa alýdy talap etip, úkimettik ǵımarattardyń kireberisine qyzyl qol izderin qaldyrdy.

Bılik koalıtsııasy ózine taǵylǵan aıyptaýlardy joqqa shyǵaryp otyr, biraq prezıdent Aleksandr Výchıch kináliler jaýapqa tartylýy kerek dedi. Osy oqıǵaǵa baılanysty eldiń kólik, qurylys jáne ınfraqurylym mınıstri, saýda mınıstri jáne memlekettik Serbııa temir jolynyń basshysy otstavkaǵa ketti.

Novı-Sad bas prokýratýrasy málimdemesinde habarlanǵandaı, qoǵamdyq qaýipsizdikke qarsy qylmystyq áreketter jasady degen kúdikpen 11 adam qamaýǵa alynǵan. Málimdemede qamaýǵa alynǵandardyń aty-jónderiniń birinshi áripteri ǵana jazylǵan.

Jergilikti BAQ qamaýǵa alynǵandar arasynda burynǵy kólik, qurylys jáne ınfraqurylym mınıstri Goran Vesıchtiń de baryn habarlady. Vesıch beısenbi kúni Facebook-tegi jazbasynda muny joqqa shyǵardy, biraq quqyq qorǵaý organdarymen kezdeskenin aıtty.

«Men polıtsııa qyzmetkerleriniń shaqyrtýyna óz erkimmen jaýap berip, olarmen Novı-Sadqa birge keldim, jáne ózimdi tergeý organdaryna tapsyrdym», - delingen habarlamada.

Osyǵan deıin Halyqaralyq qylmystyq sottyń Netanıahý men Galantty qamaýǵa alýǵa order bergenin habarladyq.