Senimhattardy onlaın rásimdeý notarıýstardyń jumysyna qalaı áser etedi

ASTANA. QazAqparat – Búginnen bastap elimizde notarıýs arqyly rásimdeletin senimhatty úıde otyryp-aq alýǵa bolady. Atalǵan qyzmet eGov mobile mobıldi qosymshasynda qoljetimdi.

Osy oraıda QazAqparat tilshisi Ádilet mınıstrinen jańa tsıfrlyq qyzmet notarıýstardyń jumysyna keri áserin tıgizbeı me, dep suraǵan edi.

«Notarıýstardyń jumyssyz qalmaý jaǵyn qarastyrdyq. Olar jumyssyz qalmaıdy. Kerisinshe jańa qyzmet túri halyqqa da, notarıýstarǵa da yńǵaıly. Onlaın qyzmeti notarıýstardyń tabysyna áser etpeıdi. Qyzmetterdiń quny burynǵysynsha saqtalady jáne ony klıentter tóleýi kerek. Notarıýs qyzmetiniń aqysyn bank qosymshalary arqyly onlaın tóleýge bolady», - dep túsindirdi Ádilet mınıstri Azamat Esqaraev.

Vedomstvo basshysynyń aıtýynsha, ótken jyly elimizde 2 mıllıonnan astam senimhat berildi.

A. Esqaraevtyń málimdeýinshe, qazaqstandyqtar kóbine múlikti jáne sottaǵy múddesin qorǵaý úshin senimhat rásimdeıdi.

Aıta ketsek, búgin elordada «Tsıfrlyq notarıat» atty pılottyq jobasy iske qosyldy.

Endigi ýaqytta qazaqstandyqtar senimhattardy notarıýsqa barmaı-aq onlaın rásimdeı alady.

«Memleket basshysy eGov mobile mobıldi qosymshasy bazasynda memleket, halyq jáne bıznestiń ózara is-qımyly úshin tıisti tsıfrlyq ınfraqurylymdy qurýdy tapsyrǵan bolatyn. Búgingi tusaýy kesilip jatqan «Tsıfrlyq notarıýs» pılottyq jobasy sol baǵyttaǵy jumystardyń biri. Qyzmet alýda qazaqstandyqtardyń ómirin jeńildetý baǵytynda paıdaly jobalardy júzege asyrýdy jalǵastyramyz», - dedi Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.