Senimhatsyz anyqtama bergen HQKO-nyń qyzmetkeri jumystan shyǵarylmaq

ASTANA. QazAqparat - Senimhatsyz anyqtama bergen «Azamattarǵa arnalǵan úkimet» memlekettik korporatsııasynyń qyzmetkeri jumystan shyǵarylady. Bul jaıynda atalǵan korporatsııasynyń baspasóz qyzmeti málim etti, dep habarlaıdy QazAqparat.

«Júrgizgen tekserýlerimizge sáıkes shyndyǵynda da azamatsha Anna Dmıtrıevıchke mekenjaı jáne jyljymaıtyn múlikke anyqtama berilgen. Anyqtamany bergen HQKO qyzmetkerleriniń aıtýynsha, olarǵa Global Capital uıymynyń qyzmetkeri júgingen. HQKO-ǵa ekinshi deńgeıli banktermen nesıe rásimdeýge jáne kredıtorlarmen jumys isteýge shart jasasqan konsaltıngtiń kompanııalardyń ókilderi turaqty túrde júginip otyrady.  Olardyń qolyndaǵy bankten alynǵan senimhat negizinde kepildik múlikke qajetti anyqtama beriledi. Jumys kúniniń sońy bolǵandyqtan uıym ókili senimhatty tańerteń ákelip berýge ýáde etip, buǵan qosa Anna Dmıtrıevıch bank klıenti ekendigin aıtqannan keıin bizdiń qyzmetker oǵan anyqtamany bergen. Bul óreskel buzýshylyqqa jol berip, senimhatsyz anyqtama bergen qyzmetker jumystan bosatylady», - delingen korporatsııa taratqan aqparatta.

Sonymen qatar «Azamattarǵa arnalǵan úkimet» memlekettik korporatsııasy Anna Dmıtrıevıchten resmı túrde keshirim surap, atalǵan faktini jarııa etkeni úshin alǵysyn bildiredi.

Esterińizge sala ketsek, Almaty qalasynyń turǵyny Anna Dmıtrıevıch Feısbýktegi paraqshasynda Halyqqa qyzmet kórsetý ortalyǵy óziniń atynan anyqtamalardy belgisiz bireýge bergendigin jazǵan bolatyn.