Senimhat arqyly satý kólik ıesin salyqtyq mindettemelerden bosatpaıdy – komıtet

NUR-SULTAN. QazAqparat – QR QM Memlekettik kirister komıteti tóraǵasynyń orynbasary Azamat Sadyqov azamattardan keıingi kezde kólik quraldaryna qatysty kóptep túsken shaǵymdarǵa qatysty pikir bildirdi, dep habarlaıdy QazAqparat tilshisi.

«Jeke tulǵalardyń kólik quraldaryna salynatyn salyq týraly keıingi kezde suraq kóp týyndap jatyr. Salyq tóleýshiler tarapynan áleýmettik jelilerde bul jaıdy bilip otyrmyz. Qazirgi ýaqytta salyq organdaryna kólik quraldary boıynsha ózderine salyq tóleýi kerektigi jónindegi habarlama alǵan azamattar júginýde. Olardan túsken málimetterdi, túsken ótininderdi mindetti túrde taldaımyz», - dedi Memlekettik kirister komıteti tóraǵasynyń orynbasary Azamat Sadyqov tikeleı efırde sóılegen sózinde.

Júrgizilgen taldaý jumystarynyń nátıjesi kóbinde kólikterin 5 nemese odan da kóp jyl buryn satyp jibergen azamattardan túsip jatqanyn kórsetken.

«Ákimshilik polıtsııa komıtetiniń málimetterimen bul suraqtar boıynsha aqparattardy salystyrdyq. Aqyry ýákiletti organdarda sol azamattardyń atynda kóliktiń bary týraly málimet baryn bildik. Kezinde satyp jibergen kólik shynynda da sol satqan azamattardyń atynda turǵan bolyp shyqty», - dedi ol.

Azamat Sadyqovtyń aıtýynsha kóp jaǵdaıda júginip jatqan azamattar bir kezderi kóligin senimhat arqyly satqan.

«Senimhat arqyly kólikti berý – menshikke berý retinde sanalmaıtynyn eskerý kerek. Sol satylǵan kólik quraly boıynsha salyq tóleıtin azamat – bir kezderi sol kólikti satqan adam bolyp shyǵady. Sebebi onyń kólik quralyn eshkim esepten shyǵarmaǵan. Senimhat álbette, atalmysh kólik quralyn basqa adamǵa júrgizýge quqyq beredi. Biraq menshik quqyǵyn bermeıdi. ıAǵnı senimhat arqyly kólikti tapsyrý – kólik ıesin salyqtyq mindettemelerden bosatpaıdy. Salyq tóleýshilerge aıtarymyz: senimhat arqyly berilgen kólikti ýákiletti organǵa baryp, esepten shyǵarý kerek», - dedi ol.