Senimdi aqtamaǵan Ertis aýdanynyń ákimi jumystan ketti - Pavlodar

NUR-SULTAN. QazAqparat - Oblys ákimdiginde ótken apparat keńesinde aımaq basshysy júktelgen tapsyrmany tıisti deńgeıde oryndamaǵan jaǵdaıda qatań shara qoldanylatyny týraly málimdedi, dep habarlaıdy pavlodarnews.kz.

«Úsh jyl jumys ishinde jumys saparlary men jıyndarda, kezdesýlerde dereý oryndalýy tıis tapsyrmalardy júkteımin, alaıda sapasyz, tıisti deńgeıde emes jáne keshiktirilip júzege asyrylady. Sondyqtan jumystan bosatýǵa deıin qatań tártiptik óndiris qoldanylady. Sebebi, árbir tapsyrmanyń artynda ekonomıkalyq jaǵdaıdyń damýy men turǵyndardyń ál-aýqatyn arttyrý tur», - dep atap ótti oblys ákimi.

Bolat Baqaýov ótken aptada Ertis aýdanyna jumys saparymen barǵanda tapsyrmalardyń basym bóligi qaǵaz júzinde qalatyndyǵyna kýá bolǵanyna toqtaldy.

«Aýdannyń kórsetkishterin jaqsartýdyń ornyna tómen túsip ketken. Jeke menshik ınvestıtsııalar óte az tartylady, barlyǵy oblystyq bıýdjettiń esebinen. «Jumyspen qamtýdyń jol kartasy-2020» baǵdarlamasy boıynsha bos turǵan úılerdi qalypqa keltirý júrgizilmegen. 10 kóp balaly otbasy baspanaǵa muqtaj. Biz oblystyq bıýdjetten qarajat bólýge daıynbyz. Alaıda, eki jyldyń ishinde tapsyrma oryndalmaǵan. Nátıjesinde Ertis aýdanynyń ákimi Serik Batyrǵojınov jumystan ketý týraly ótinish jazdy jáne men ony qabyldap, qol qoıdym, Prezıdent ákimshiligine joldadym» - dedi aımaq basshysy.

Eske salsaq, buǵan deıin Pavlodar oblysynyń ákimi Bolat Baqaýov qala ákimi Ánýar Kúmpekeevke qatań sógis jarııalaǵany týraly habarlaǵan bolatynbyz.