Senattaǵy kadrlyq ózgerister
Asqar Beısenbaev óz ótinishi boıynsha Senat tóraǵasynyń orynbasary qyzmetinen bosatyldy. Palata tóraǵasynyń usynysy boıynsha Bektas Beknazarov tóraǵa orynbasary bolyp saılandy.
Senat qaýlysymen Talǵatbek Abaıdildın Ekonomıkalyq saıasat, ınnovatsııalyq damý jáne kásipkerlik komıtetiniń tóraǵasy, Ikram Adyrbekov Halyqaralyq qatynastar, qorǵanys jáne qaýipsizdik komıtetiniń tóraǵasy, Aqan Bıjanov Áleýmettik-mádenı damý jáne ǵylym komıtetiniń tóraǵasy qyzmetterinen óz ótinishteri boıynsha bosatyldy. Q.Toqaev turaqty komıtetterdiń burynǵy tóraǵalarynyń joǵary kásibı biliktiligin atap ótti jáne olardyń elimizdiń zań shyǵarý júıesin jetildirýdegi tıimdi jumystaryna alǵys aıtty.
Halyqaralyq qatynastar, qorǵanys jáne qaýipsizdik komıtetiniń tóraǵasy bolyp Darıǵa Nazarbaeva saılandy. Ekonomıkalyq saıasat, ınnovatsııalyq damý jáne kásipkerlik komıtetiniń tóraǵalyǵyna Asqar Beısenbaev, Áleýmettik-mádenı damý jáne ǵylym komıtetiniń tóraıymy bolyp Birǵanym Áıtimova saılandy.
Senat tóraǵasynyń usynymy boıynsha Aleksandr Gorıaınov pen Talǵat Jaqan Respýblıkalyq bıýdjettiń atqarylýyn baqylaý jónindegi esep komıtetiniń músheleri bolyp saılandy.
Depýtattar Qazaqstan men Aýǵanstan arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly úkimetaralyq kelisimdi ratıfıkatsııalady. 2015 jylǵy 20 qarashada Astanada qol qoıylǵan kelisim eki memlekettiń azamattyq qorǵanys, tabıǵı jáne tehnogendik qaýipterdiń aldyn alý, tótenshe jaǵdaılardy joıý, apatty jaǵdaılarda erikti túrde jáne ózara kómek kórsetý jónindegi azamattyq qorǵanys mamandaryn oqytý salasyndaǵy ózara is-qımylyn retteıdi. Qujatta Qazaqstan men Aýǵanstannyń quzyretti organdarynyń ózara is-qımylynyń túrlerin, sondaı-aq tótenshe jaǵdaılardyń sıpaty men aýqymyn, túrleri men qajetti kómektiń kólemin eskere otyryp ózara kómek kórsetý retin belgileıdi.
Otyrys barysynda senator Qýanysh Aıtahanovtyń «Dostyq» arnasy arqyly keletin sýdyń kólemin ýaqytynda naqtylaý týraly; Jabal Erǵalıevtiń «Astana-Býrabaı» avtomobıl jolyna qosylý jáne ony kesip óterdegi qıyndyqtar men qolaısyzdyqtar týraly jáne «Almaty-1 - Arqalyq» baǵyty boıynsha jolda toqtamaıtyn vagondardyń qatynasyn qalpyna keltirý týraly; Aqan Bıjanovtyń turǵyn úıge ıpotekalyq qaryzdary shetel valıýtasymen berilgen qaryz alýshylardyń qaryzdaryn qaıta qarjylandyrý týraly jáne avtomobıl júrgizý quqyǵyna kýálik alý úshin synaq tapsyrýǵa jiberilgen adamdardy tıisti oqý ortalyqtarynda mindetti túrde oqytýdy engizý týraly depýtattyq saýaldary tyńdaldy.