Senatta jýrnalısterdi marapattaý rásimi ótti

NUR-SULTAN. QazAqparat - Senat tóraǵasy Máýlen Áshimbaev jýrnalıster arasyndaǵy «Amanat» jáne «Týǵan el» baıqaýlarynyń jeńimpazdary men júldegerlerin marapattady, dep habarlaıdy QazAqparat Senattyń baspasóz qyzmetine silteme jasap.

Máýlen Áshimbaev júldelerdiń Táýelsizdik kúni qarsańynda tapsyrylýynyń sımvoldyq máni bar ekenine nazar aýdardy.

«Táýelsizdik – bizdiń eń basty qundylyǵymyz. Shyn máninde, Táýelsizdiktiń arqasynda eńseli el boldyq. Búkil álem moıyndaǵan memleket retinde qalyptastyq. Ekonomıkada, saıasatta, áleýmettik jáne rýhanı baǵytta aýyz toltyryp aıtarlyqtaı jetistikterge qol jetkizdik. Otandyq buqaralyq aqparat quraldarynyń jáne jýrnalıstıkanyń damýy da osy egemendiktiń arqasy», – dedi Senat tóraǵasy.

Sonymen qatar Máýlen Áshimbaev Parlament qabyldaǵan ár zań men sheshimdi halyqqa jetkizip, aqparat taratýda buqaralyq aqparat quraldarynyń mańyzy zor ekenin atap ótti.

«Qazirgi tańda Memleket basshysynyń tapsyrmasymen kóptegen tyń bastamalar qolǵa alynýda. Soǵan baılanysty azamattardyń áleýmettik jaǵdaıyn jaqsartýǵa, adam quqyǵyn qamtamasyz etýge, densaýlyq saqtaý, bilim berý salalaryn jetildirýge arnalǵan zańdar qabyldanýda. Shaǵyn jáne orta bıznesti qoldaý, qorshaǵan ortany qorǵaý, sybaılas jemqorlyqpen kúres baǵyttary da basty nazarda. Sonyń bárin halyqqa jetkizip, ár zańnyń máni men mańyzyn túsindirý isinde jýrnalısterdiń róli erekshe», – dedi Senat tóraǵasy.

Ol qazirgideı syn-qaterler kóbeıgen zamanda aqparattyń máni arta túskenin de tilge tıek etti. Soǵan baılanysty jýrnalısterge júkteletin mindettiń salmaǵy aýyr ekenine nazar aýdaryp, indet kezindegi tilshiler qaýymynyń belsendiligine toqtaldy.

«Jýrnalıster qaýymynyń pandemııa kezindegi eseli eńbegin erekshe atap ótken jón. Sizder dáriger, tártip saqshylarymen birge indetpen kúrestiń aldyńǵy shebinde júrdińizder. Bul eńbekterińiz eń joǵary baǵaǵa laıyq», – dedi Máýlen Áshimbaev.

Aıta keteıik, «Amanat» jáne «Týǵan el» baıqaýlary jýrnalıster kúnine oraı Senattyń uıymdastyrýymen ótkizildi. Qorytyndysy maýsym aıynda jarııalanǵanymen eldegi epıdemıologııalyq ahýalǵan baılanysty marapattaý rásimi keıinge shegerildi.

Bıyl eki baıqaýǵa elimiz boıynsha 120-ǵa jýyq (118) jumys kelip tústi. Baıqaý qorytyndysyn shyǵarǵan kezde pandemııa tusynda belsendiligimen kózge túsken jýrnalıster de nazardan tys qalǵan joq. Sonymen qatar ınternet jýrnalıstıka, áleýmettik jeli salalarynda eńbek etip júrgen mamandar úshin de arnaıy syılyq taǵaıyndaldy.

Odan bólek, búgin TMD Parlamentaralyq Assambleıasynyń nagradalaryn ıelengen elimizge belgili jýrnalıster de marapattaldy.

«AMANAT» BAIQAÝYNYŃ LAÝREATTARY:

Gran-prı – Ońǵar Toqanov, «Qazaqstan» telearnasynyń tilshisi.

Birinshi oryn – Jadyra Jolmuhametova, «Informbıýro» aqparat agenttiginiń tilshisi.

Ekinshi oryn – Laýra Túsipbekova, «Kazahstanskaıa pravda» gazetiniń tilshisi.

Úshinshi oryn – Tatıana Kovaleva, «Zakon.kz» portalynyń tilshisi.

«TÝǴAN EL» BAIQAÝYNYŃ LAÝREATTARY:

Gran-prı – Azamat Qasymov, «Egemen Qazaqstan» gazetiniń tilshisi.

Birinshi oryn – «Eýrazııa» birinshi arnasynyń «Senat online» telejobasynyń ujymy.

Ekinshi oryn – Mırlan Altynbek, «Habar 24» agenttiginiń tilshisi.

Úshinshi oryn – Ámirbolat Hýsaıan, «Azattyq Ruhy» aqparat agenttiginiń tilshisi.

Arnaýly marapat ıegerleri:

Ǵazız Ábishev – Abishev Analytics Telegram arnasynyń avtory;

Ivan Sýhorýkov pen Roman Pavlov – «Tengrinews» ınternet-resýrsynyń jýrnalısi jáne beıne-ınjeneri;

Ulpan Begalına – «Atameken business» arnasynyń tilshisi;

Aıhan Sháripov – «AIQYN» gazetiniń tilshisi;

Syrym Itqulov – «Hola news» shef-redaktory;

«Ainews» jáne «Aitube.kz» ınternet jobalarynyń ujymdary.