Senatta TMD memleketterimen ózara saýdadaǵy tehnıkalyq kedergilerdi joıý máselesi qaraldy
Atap aıtqanda, bul kelisim 2012 jyly Máskeýde jasalǵan. Qujat Keden odaǵyna múshe memleketter bolyp tabylmaıtyn, Táýelsiz Memleketter Dostastyǵyna qatysýshy memleketter arasyndaǵy ózara saýdadaǵy tehnıkalyq kedergilerdi joıýǵa, TMD elderi ónimderiniń Keden odaǵynyń biryńǵaı keden aýmaǵyna shyǵýyn jeńildetýge, ózara saýda-ekonomıkalyq jáne ınvestıtsııalyq yntymaqtastyqty keńeıtýge baǵyttalǵan. Budan bólek, kelisimde Keden odaǵyna múshe bolyp tabylmaıtyn TMD-ǵa qatysýshy memleketterdiń Keden odaǵynyń tehnıkalyq reglamentterine qosylýynyń tártibi men sharttary aıqyndalady.
Kelisimge sáıkes, TMD-ǵa qatysýshy kez kelgen memleket Eýrazııalyq ekonomıkalyq komıssııaǵa ónimniń belgili bir túrlerine qatysty ózara saýdadaǵy tehnıkalyq kedergilerdi joıý týraly suraý jiberýge quqyly. Komıssııa osy suraýdyń negizinde Keden odaǵynyń tehnıkalyq reglamentteriniń tizbesin belgileıdi, olar suraý salýda aıqyndalǵan ónim túrlerine qoldanylatyn bolady. Sondaı-aq, kórsetilgen tehnıkalyq reglamentterdi qoldaný úshin qajetti komıssııa sheshimderiniń tizbesin anyqtap, olardy múddeli memlekettiń nazaryna jetkizedi.