Senatta sýdy tıimdi paıdalaný baǵytynda biryńǵaı operator belgileý usynyldy

ASTANA. QazAqparat - Senator Janbolat Jórgenbaev depýtattyq saýalynda egistikterge sý tartý máseleleri, olardyń sebepteri men sheshý joldary týraly oı aıtty, dep habarlaıdy QazAqparat tilshisi.

Onyń aıtýynsha, mamandar jekeshelendirý barysynda keıbir sý sharýashylyǵy nysandarynyń jeke adamdardyń menshigine ótýine qarsy. Kóbine olarlyń ıeleri bul qurylymdardyń jaǵdaıyn jaqsartýǵa aqsha salmaıdy. Osyǵan baılanysty depýtat Úkimet birqatar sharalar qabyldaýy qajet dep esepteıdi.

«Sýdy tıimdi paıdalaný úshin biryńǵaı operatordy belgileý týraly máseleni pysyqtaý mańyzdy. Sondaı-aq, Balqash aýdany aýmaǵyndaǵy Іle ózeninde bóget salý boıynsha jobalaý-smetalyq qujattamany tez arada aıaqtaý qajet. Osyǵan baılanysty bir sýarý kanalynda ornalasqan eki jáne odan kóp jer paıdalanýshylarǵa sýarý kanalyn paıdalanýdyń tártibin belgileıtin erejeni bekitý mańyzdy», - dedi depýtat Úkimet basshysy Álıhan Smaıylovtyń atyna joldaǵan saýalynda.

Sonymen qatar, senator aýyl sharýashylyǵynda sýdy tıimdi paıdalanýdy qamtamasyz etýdiń 2023-2026 jyldarǵa arnalǵan jol kartasyna birqatar ózgeris engizý qajet dep esepteıdi.

«Atap aıtqanda, sýmen qamtamasyz etýdiń óńirlik tabıǵı erekshelikterin eskere otyryp, aýyl sharýashylyǵy daqyldaryn sýarý qaǵıdalarynyń jobasyn jáne sý paıdalaný tarıfin qurýdy jetildirý mańyzdy», - dep atap ótti senator.