Senatta Konstıtýtsııalyq zańdardyń jobalary qaralady
16:14, 31 Qazan 2022
ASTANA. QazAqparat - Parlament Senatynyń Bıýrosy 3 qarashada ótetin Palata otyrysynyń kún tártibin bekitti, dep habarlaıdy QazAqparat.
Vedomstvonyń málimetinshe, aldaǵy beısenbide senatorlar Memleket basshysynyń tapsyrmalaryn iske asyrýdy qamtamasyz etýge arnalǵan birqatar zań jobasyn qaraıdy.
Atap aıtqanda, «Qazaqstan Respýblıkasynyń Konstıtýtsııalyq Soty týraly», «Prokýratýra týraly», «Qazaqstan Respýblıkasyndaǵy Adam quqyqtary jónindegi ýákil týraly» jáne «Qazaqstan Respýblıkasynyń keıbir konstıtýtsııalyq zańdaryna Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» konstıtýtsııalyq zańdardyń jobalary Senat otyrysynyń kún tártibine engizildi.
Odan bólek, Bıýro otyrysynda Májilisten kelip túsken zań jobalary Senattyń turaqty komıtetterine bólinip berildi.