Senatta konstıtýtsııalyq reformalar aıasyndaǵy sottar men prokýratýra qyzmetiniń keleshegin talqylady

ASTANA. QazAqparat - Senatta memlekettik bılik tarmaqtary arasyndaǵy ókilettikterdi qaıta bólý máseleleri jónindegi konstıtýtsııalyq reformalar jobasy boıynsha Joǵarǵy Sot pen Bas prokýratýra basshylyǵymen kezdesý boldy.

Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaı konstıtýtsııalyq reformalar aıasyndaǵy sottar men  prokýratýra qyzmetiniń negizgi baǵyttary talqylaý taqyryby ekenin atap ótti.

Joǵarǵy Sottyń Mamandandyrylǵan sot alqasynyń tóraǵasy Aıgúl Qydyrbaeva sot júıesiniń qyzmetin jetildirýge qatysty birqatar usynystar aıtty. Atap aıtqanda, Joǵarǵy Sot sýdıalarǵa qoıylatyn talaptar Konstıtýtsııalyq zań deńgeıinde bekitilgeni oryndy dep sanaıdy. Sondaı-aq sýdıalyqqa úmitkerlerdiń eń tómengi jasyn 25-ten 30-ǵa deıin kóterýdi usyndy.

Qazaqstandaǵy Ult josparyn iske asyrý aıasynda úsh deńgeıdegi sot tóreligi júıesi engizildi. Osyǵan baılanysty Konstıtýtsııada jergilikti jáne basqa sottarǵa qatysty Joǵarǵy sottyń kassatsııalyq ınstantsııa mindetin júzege asyratyny kórinis tabýy tıis. Ata zańnyń 81-shi babyna tıisti ózgerister engizý kózdelip otyr. Odan basqa, A. Qydyrbaeva Halyqaralyq «Astana» qarjy ortalyǵy sot júıesiniń qyzmetin retteıtin túzetýlerge de toqtaldy.

Bas prokýrordyń birinshi orynbasary Iogan Merkel óz sózinde bılikti qaıta qalyptaý jaǵdaıynda prokýratýra qyzmetiniń konstıtýtsııalyq negizderi de naqtylanatynyn atap ótti.

«Prokýratýra tejemelik pen ara salmaq júıesinde  Konstıtýtsııanyń myzǵymastyǵy men adam  men azamat quqyqtarynyń kepili - Prezıdenttiń quraly bolyp qala beredi, degenmen qadaǵalaýdyń shegi men sıpaty zańmen belgilenedi», - dedi I. Merkel. Ol engiziletin ózgerister prokýratýranyń konstıtýtsııalyq ókilettikterin azaıtpaıtynyn atap ótti.

Prokýratýranyń jekelegen ókilettikterin bıliktiń sot tarmaǵyna berý de usynylyp otyr. Odan basqa, prokýratýra Konstıtýtsııada bekitilgen memleket múddesin qorǵaý qajet bolatyn istermen shektelip, jeke daýlarǵa qatysty azamattyq isterge qatysýyn qysqartýdy jalǵastyrýǵa nıettenýde.

I. Merkel Bas prokýratýraǵa Konstıtýtsııalyq Keńeske derbes úndeý jasaý quqyǵy berilýi, sondaı-aq prokýratýranyń mártebesi men ókilettigin Konstıtýtsııalyq zań deńgeıinde belgileý týraly senator Rashıd Túsipbekovtyń usynysyna qoldaý bildirdi. «Konstıtýtsııalyq zańda joǵary deńgeıde qadaǵalaý júrgizetin konstıtýtsııalyq organ retinde prokýratýranyń rólin atap ótý durys dep sanaımyz», - dedi Bas prokýrordyń birinshi orynbasary.

Senat depýtattary Rashıd Túsipbekov, Dýlat Qusdáýletov, Darhan Káletaev, Lıýdmıla Poltorabatko, Manap Kóbenov Konstıtýtsııaǵa jáne basqa da zańnamalyq aktilerge usynylatyn ózgerister týraly óz oılaryn ortaǵa saldy.

Sharany qorytyndylaı kelip, senator Serik Aqylbaı pikirsaıys barysynda aıtylǵan usynystar konstıtýtsııalyq reformany iske asyrý jónindegi zań shyǵarý jumysy barysynda eskeriletinin atap ótti.