Senatta Qazaqstan men Qytaı azamattarynyń kóshi-qonyna qatysty zań maquldandy

<p>Búgin Senattyń jalpy otyrysynda &laquo;Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Taraptar memleketteriniń azamattaryna qatysty aqparat almasý týraly kelisimdi ratıfıkatsııalaý týraly&raquo; Zańy maquldandy, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Kelisimge Memleket basshysynyń Qytaıǵa sapary barysynda bıylǵy 17 mamyrda Sıan qalasynda Qytaı Halyq Respýblıkasy jáne Qazaqstan Respýblıkasynyń Syrtqy ister mınıstrleri qol qoıdy.

Zańnyń maqsaty - Qazaqstan men Qytaı azamattaryna qatysty kóshi-qon salasynda aqparat almasý boıynsha ózara is-qımyl jasaý.

«Bul málimetter qos azamattyqqa qarsy kúreske, sondaı-aq zańsyz kóshi-qon arnalarynyń jolyn kesý úshin qajet. Shartty iske asyratyn quzyretti organdar retinde Qazaqstan jaǵynan Іshki ister mınıstrligi men Eńbek jáne halyqty áleýmettik qorǵaý mınıstrligi, al Qytaı jaǵynan Syrtqy ister mınıstrligi men Kóshi-qon isteri boıynsha memlekettik basqarma belgilengen», - dedi senator Murat Qadyrbek.

Atalǵan organdar azamattarynyń derbes derekteriniń qorǵalýyna jaýap beredi.

«Kelisimde egemendikke, qaýipsizdikke qaýip tóngende jáne zańnamaǵa qaıshy kelgen jaǵdaıda, suraý salýlardy oryndaýdan bas tartý kózdelgen. Qazirgi kezde osyndaı eki jaqty kelisim bes elmen (Ázerbaıjan, Belarýs, Qyrǵyzstan, Tájikstan, Ózbekistan) jasalǵan. Sondaı-aq Reseımen, Armenııamen, Qyrǵyzstanmen kópjaqty shart bar. Kelisimdi ratıfıkatsııalaý kóshi-qon jáne qos azamattyqqa qarsy is-qımyl salasynda Qazaqstan Respýblıkasy men Qytaı Halyq Respýblıkasynyń arasyndaǵy yntymaqtastyqty nyǵaıtýǵa yqpal etedi, jáne taraptardyń azamattary týraly aqparat almasý jóninde tıisti quqyqtyq tetikti jasaýǵa múmkindik beredi», - dedi depýtat.

Óz kezeginde Senat tóraǵasy Máýlen Áshimbaev atalǵan zań aıasynda aqparat almasý memleket múddesin eskere otyryp júzege asyrylatynyn aıtty.

«Maquldanǵan zań eki eldiń mıgratsııa salasyndaǵy quzyretti organdary arasyndaǵy qarym-qatynasty damytýǵa oń septigin tıgizedi dep senemiz», - dedi Senat tóraǵasy.