Senatta ǵalymdardy qoldaýdy kúsheıtý týraly zań qaraldy

<p>ASTANA.KAZINFORM - Senattyń Áleýmettik-mádenı damý jáne ǵylym komıtetiniń depýtattary keńeıtilgen otyrysta &laquo;Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly&raquo; zańdy talqylady.</p>

Parlament depýtattarynyń bastamasy boıynsha ázirlengen zań ǵylymı zertteýlerdiń tıimdiligin arttyrýǵa, ǵalymdarǵa áleýmettik kepildikterdi jaqsartýǵa jáne ǵylymdaǵy qarjy resýrstaryn ońtaılandyrýǵa baǵyttalǵan. Qujatta óńirdiń basym baǵyttary boıynsha ǵylymı jobalar men baǵdarlamalar uıymdastyrýmen qosa jergilikti atqarýshy organdarǵa ǵylym salasyndaǵy memlekettik saıasatty iske asyrýǵa quqyq berý kózdelip otyr. 

Qujatta joǵary oqý oryndary men ǵylymı uıymdardaǵy pedagogter men ǵylymı qyzmetkerlerdiń jalaqysyna qosymsha aqy belgileý jónindegi normalar kózdelgen. Sondaı-aq ǵylymı, ǵylymı-pedagogıkalyq jáne ǵylymı-tehnıkalyq jumystardy aıaqtaý úshin shyǵarmashylyq demalysqa quqyq beriledi. «Ǵylymı etıka» uǵymy ǵylymı jáne ǵylymı-tehnıkalyq qyzmetke qatysýshylar ustanatyn qaǵıdalar, erejeler men normalardyń jıyntyǵy retinde engiziledi. Sondaı-aq ǵylymı ádepke úlgi qaǵıdalar ázirleý jáne bekitý jónindegi ýákiletti organnyń quzyreti belgilenedi. 

Zań joǵary jáne joǵary oqý ornynan keıingi oqý oryndaryna túsý kezinde merzimdi áskerı qyzmet ótkergen azamattarǵa jeńildikter, sondaı-aq jataqhanadan oryn alýǵa basym quqyq beredi.

Senatorlardyń aıtýynsha, zańnyń qabyldanýy ǵylymı qyzmetkerdi áleýmettik qorǵaýdy odan ári kúsheıtýge, ǵalymnyń bedeli men eńbek tıimdiligin arttyrýǵa, sondaı-aq ǵylymnyń elimiz ekonomıkasyn damytýǵa qosqan úlesin arttyrýǵa yqpal etetin bolady.

Komıtet músheleri talqylaý qorytyndysy boıynsha zańdy Palata otyrysynda qaraýǵa jiberý týraly sheshim qabyldady.