Senatta el bıýdjetiniń kirisin qalaı arttyrýǵa bolatyny aıtyldy

NUR-SULTAN. QazAqparat - Senator Dáýren Ádilbekov elimizdiń Premer-Mınıstri Álıhan Smaıylovtyń atyna depýtattyq saýal joldady. Onda ol el bıýdjetiniń kiristerin qalaı arttyrýǵa bolatyndyǵy týraly usynys aıtty, dep habarlaıdy QazAqparat tilshisi.

Senator munaı, gaz jáne basqa da paıdaly qazbalardy óndirýmen aınalysatyn kompanııalarǵa salyq mólsherin arttyrý bıýdjetke túsetin túsimderdi ulǵaıtýdyń bir tásili bola alatynyn atap ótti. Qazir olardyń salyq júktemesi 8-9%-dan aspaıdy. Al bul is júzinde shıkizattyq emes sektorda jumys isteıtin kásipkerlerdiń júktemesine teń.

Basqa elderde orny tolmaıtyn tabıǵı qorlar úshin jer qoınaýyn paıdalanýshylarǵa salyq salý 25%-ǵa jetýi múmkin.

Senator taý-ken metallýrgııa sektoryndaǵy ekonomıkalyq jaǵdaı qazir daǵdarysqa deıingi deńgeıge oraldy, dep atap ótti. London tústi metaldar bırjasynyń málimetteri boıynsha, ótken jyly altynnyń baǵasy 40,6%-ǵa, kúmis - 71%-ǵa, temir rýdasy - 110%-ǵa ósti, al mys úshten bir ese qymbattady. Sonymen birge osyndaı kompanııalardyń kirisi de ósýde.

«Taý-ken sektoryndaǵy jer qoınaýyn paıdalanýshylarǵa bırjalyq negizgi eksporttyq pozıtsııadaǵy qatty paıdaly qazbanyń PQÓS (paıdaly qazbalardy óndirý salyǵy) mólsherin shamamen 1,5-2 esege ulǵaıtý arqyly salyq júktemesi ulǵaıýy tıis dep esepteımiz. Bul shara PQÓS boıynsha qosymsha túsimderdi shamamen 200 mlrd teńgege ulǵaıtýǵa múmkindik beredi. Budan basqa, taý-ken metallýrgııa kesheniniń marjınaldyǵy joǵary ekenin atap ótken jón. Tek 2017-2018 jyldary jarııalanǵan qarjylyq esepterge sáıkes, atalǵan sektor shetelge jalpy somasy 3 trln teńgege jýyq dıvıdend tóledi», - dedi depýtat Senattyń jalpy otyrysynda.

Senator sheteldikterge tólenetin osyndaı dıvıdendterden salyq jınaý júıesin ózgertýdi usyndy. Qazir Qazaqstan rezıdent emesterdi bizdiń elimizde paıdaly qazbany óndirý esebinen alynǵan dıvıdendterdiń bir bóligine salyq tóleýge mindettemeıdi. Senatordyń aıtýynsha, damýshy elderdiń kópshiligi rezıdent emesterge tólengen dıvıdendterdi salyq salýdan bosatpaıdy.

«Qazaqstan Respýblıkasy ratıfıkatsııalaǵan barlyq konventsııalardyń erejelerinde rezıdent emesterge dıvıdendter túrinde tabys tóleý kezinde Qazaqstan Respýblıkasyna salyq salýǵa basym quqyq kózdelgendikten, devıdendten salyq salýdan bosatý jónindegi jeńildikti alyp tastaýdy oryndy dep sanaımyz», - dedi Dáýren Ábilbekov.

Depýtattyń pikirinshe, Qazaqstan Respýblıkasynyń taýar bırjalarynda jasalǵan mámilelerdi baqylaýdan bosatý jónindegi jeńildikterdi alyp tastaý da bıýdjet kirisin ulǵaıtýy tıis.