Senatta balalardy qorlaǵany úshin jaýapkershilikti kúsheıtý usynyldy
Dúnıejúzilik densaýlyq saqtaý uıymynyń derekteri boıynsha, sońǵy 5 jylda Qazaqstan óz-ózine qol jumsaý deńgeıi boıynsha, onyń ishinde 15-17 jas aralyǵyndaǵy topta álem elderiniń ondyǵyna kiredi.
«Ǵalymdar men sarapshylardyń sońǵy zertteý qorytyndylaryna qaraǵanda, jasóspirimderdiń 17 paıyzy mektepte aıyna bir nemese birneshe ret qysymǵa ushyraıdy eken. Úıden tys jerde zábir kórip, ony ata-anasynan, muǵaliminen jasyryp, óz problemasymen jeke qalǵan bala aýyr psıhologııalyq daǵdarysqa ushyrap, strestik jaǵdaıdy bastan keshedi jáne onyń sońy orny tolmas jaǵdaılarǵa soqtyryp júr. Sýıtsıdıaldyq minez-qulyqtyń etıologııasynda jalpy paıdalanýdaǵy telekommýnıkatsııalyq-aqparattyq júıelerde ózine-ózi qol jumsaýdy nasıhattap, balalardy sýıtsıdke ıtermeleý aqparattarynyń tyıylmaı ornalasýynyń barǵan saıyn negizgi rol oınap otyrǵany alańdatady»,- dedi deýptat Úkimet basshysynyń orynbasary Eraly Toǵjanovtyń atyna joldaǵan saýalynda.
Rysqalı Ábdikerov Qasym-Jomart Toqaev 2022 jyldy Qazaqstanda balalar jyly dep jarııalaǵanyn atap ótti. Óz kezeginde áńgime merekelik is-sharalar uıymdastyrýda emes, eń aldymen, densaýlyq saqtaý, bilim berý jáne áleýmettik qamsyzdandyrý salasyndaǵy ýákiletti organdardyń balany qorǵaýǵa baǵyttalǵan naqty sharalary týraly bolýy tıis.
Depýtat qazir mektepterde psıhologtardyń nátıjeli jumys isteýine jaǵdaı jasaý, balalardyń mazasyzdaný deńgeıin, sýıtsıdke beıimdiliginiń alǵashqy belgilerin anyqtaýǵa jáne der kezinde sharalar qabyldaýǵa baǵyttalǵan balalarmen jumystyń naqty baǵdarlamasyn qalyptastyrý mańyzdy dep esepteıdi.
«Qazaqstan Respýblıkasynyń Ákimshilik quqyq buzýshylyq týraly kodeksine ózgerý engizip, bilim berý uıymynyń basshysy bilim berý protsesine qatysýshyǵa baılanysty býllıng/kıberbýllıng jaǵdaılary týraly ýákiletti organdarǵa habarlamaǵany úshin jaýapkershilik engizý qajet. Mektepterde oqýshylardyń ózara janjaldasýy men teketiresiniń, basqa da quqyq buzýshylyqtyń aldyn-alý úshin áleýmettik ońaltý men tatýlastyrý qyzmetterin qurý mańyzdy»,- dedi depýtat.