Senatorlardyń kezdesýleri Elbasy Joldaýynyń tarıhı mańyzyn jan-jaqty talqylaýǵa arnaldy
Osyndaǵy jurtshylyqpen, máslıhat depýtattarymen jáne eńbek ardagerlerimen kezdesýlerdiń basty taqyryby Elbasynyń «Qazaqstan joly - 2050: Bir maqsat, bir múdde, bir bolashaq» Joldaýynyń tarıhı mańyzyn jan-jaqty talqylaýǵa arnaldy.
- Qazaqstannyń 2050 jylǵa deıingi damý Strategııasy elimizdiń álemniń damyǵan 30 memleketiniń qataryna enýimizge kepildik beredi, - dedi senator óz sózinde.
- Biz úshin, ásirese Elbasynyń Máńgilik el bolý ıdeıasy úlken tarıhı mańyzy bar mindet bolyp sanalady. Elbasy sol Máńgilik eldiń irgetasyn bekemdep kóterip berdi. Máńgilik eldiń Astanasy salyndy! Jurtshylyqpen pikir almasý barysynda senator teńge baǵamynyń ózgerýine túsinistikpen qaraý qajettigin aıtty. - Halqymyzdyń táýelsizdigi úshin bizdiń ata-babalarymyz da talaı tar jol, taıǵaq keshýden ótken bolatyn. Keshegi alash qaıratkerleri de el táýelsizdigi úshin óz bastaryn báıgege tigip, qaısarlyqpen kúresti. Biz de táýelsizdikti nyǵaıtý jolynda kezdesetin synaqtarǵa túsinistikpen qarap, sabyr saqtaýǵa tıispiz. Óıtkeni, bul - bizdiń óz Táýelsizdigimiz! - dedi senator Jabal Erǵalıev.
Senatormen pikir almasý barysynda ereımentaýlyqtar Ulttyq banktiń bul qadamyna túsinistikpen qarap, eldiń birligi men yntymaǵyn saqtaý jáne el ıgiligi úshin eselep eńbek etý qajettigin aıtty. Jergilikti turǵyndar depýtat nazaryna ózderin tolǵandyryp otyrǵan máselelerdi jetkizdi.
Jabal Erǵalıev Kókshetaý qalasyndaǵy «Kókshetaý» mádenıet saraıynda ótken máýlit merekesine qatysyp, sóz sóıledi.
- Búgingi kún barshamyzdyń táýbemizge kelip, shúkirshilik qylar kúnimiz. El Táýelsizdiginiń qadiri men qasıetin qazirgi kezde tereń sezinetinimiz daýsyz. Óıtkeni, mynandaı záýlim saraıda Paıǵambarymyzdyń týǵan aıynyń máýlit merekesin ótkizýdi bylaı qoıyp, dinge senýdiń ózi múmkin emes edi ǵoı. Táýelsizdiktiń arqasynda búginde dinimizdi de ardaqtap otyrmyz, - dedi senator óz sózinde. - Ata zańymyz boıynsha dinı senim bostandyǵyna kepildik berilgen. Búginde óz dinimiz ben óz tilimizdi taza ustaý, oǵan berik bolý ózekti máseleniń biri. Ásirese, jastardyń túrli teris aǵymdaǵy dinderdiń yqpalynda ketpeýi úshin olardy halqymyzdyń salt-dástúri negizinde tárbıeleýge erekshe mán berilýi kerek. Senator Elbasynyń Qazaqstan halqyna arnaǵan bıylǵy Joldaýyna sáıkes, Máńgilik El bolý muratyn iske asyrý keleshek urpaqqa amanat bolýy kerek ekenin aıtty.
Al Senat depýtaty Svetlana Jalmaǵambetova Memleket basshysynyń Joldaýyn túsindirý maqsatynda 10 kezdesý ótkizdi. Ol Aqmola oblysynyń Jarqaıyń, Tselınograd, Astrahan, Atbasar, Sandyqtaý, Shortandy, Esil aýdandary men Kókshetaý, Stepnogor qalalarynyń jurtshylyǵymen júzdesti.
Turǵyndardyń bári Joldaýdy yqylaspen qarsy aldy, dep atap ótti depýtat. Senator 2014-2016 jyldarǵa arnalǵan respýblıkalyq bıýdjette áleýmettik baǵdarlamalardy, sondaı-aq Aqmola oblysyndaǵy respýblıkalyq baǵdarlamalardy iske asyrý úshin qarastyrylǵan qarjy týraly aımaq eńbekkerlerin habardar etti. Bul rette Şýche-Býrabaı kýrorttyq aımaǵyn damytýǵa 19 mıllıard teńge, Astana qalasynyń mańaıyndaǵy aýmaqqa 10 mıllıard teńge, monoqalalardy damytý baǵdarlamasy boıynsha Stepnogor qalasyna 3,7 mıllıard teńge, Kókshetaý qalasy aımaǵyn damytýǵa 4,7 mıllıard teńge bólinedi.
Sý, jol, jylý, áleýmettik salalar boıynsha ár aýdandaǵy turǵyndardy mazalaǵan mańyzdy máseleler 2014-2016 jylǵy bıýdjette bólinetin qarjymen sheshimin tabatyn boldy.
Saılaýshylar senatorǵa ózderin tolǵandyrǵan máseleler týraly áńgimeledi. Olardyń ishinde aımaqtaǵy sapaly aýyz sýmen qamtamasyz etý, jol jóndeý, Esil, Atbasar qalalaryndaǵy jylý qazandyqtarynyń qurylysyn salý, oblystaǵy keıbir aýyldarǵa elektr jaryǵy men sý jetkizý, shaǵyn jınaqtalǵan mektepterdi qarjylandyrý jáne onyń jumysy, zeınetaqyny qaıta esepteý jáne basqa da máseleler bar.
Bul kúni senator Sergeı Plotnıkov Shyǵys Qazaqstan oblysynyń Aıagóz aýdandyq ákimdigindegi ahýaldyq ortalyǵynda Qazaqstan Prezıdentiniń Joldaýyn túsindirý jóninde kezdesý ótkizdi.
Júzdesýge aýdan ákimi N.Nurǵalıev, qala ákimi B. Baıahmetov, máslıhat hatshysy T.Boztaev jáne bólim basshylary úkimettik emes uıymdardyń ókilderi qatysty.
Senator Memleket basshysynyń Qazaqstan halqyna Joldaýynda belgilegen elimizdiń damýynyń negizgi baǵyttaryn iske asyrý týraly áńgimeledi. Qazaqstandyqtyń ál-aýqatyn nyǵaıtý jáne barlyq azamattarǵa qolaıly jaǵdaı qalyptastyrý elimizdi jańǵyrtýdy júzege asyrýdyń negizgi qaǵıdalary ekeni aıtyldy. S.Plotnıkov alǵa qoıylǵan mindetterdi tabysty iske asyrý úshin barsha azamattardyń birlese otyryp, tabandylyqpen eńbek etýi qajet ekenin atap ótti.