Senatorlar ushqyshsyz apparattardyń óndirisi týraly aıtty

NUR-SULTAN. QazAqparat - Búgin Parlament Senatynyń jalpy otyrysynda depýtattar ushqyshsyz ushatyn apparattardy óndirýdi uıymdastyrý máselesin kóterdi. Osy máselege oraıda QR Úkimet basshysy Asqar Mamınniń atyna depýtattyq saýal joldandy, dep habarlaıdy QazAqparat tilishsi.

«Aǵymdaǵy jylǵy 15 sáýirde Mınsk qalasynda Qazaqstan Respýblıkasy Parlamenti Senaty men Belarýs Respýblıkasy Ulttyq jınalysynyń Respýblıka Keńesi arasynda ınnovatsııalyq saladaǵy yntymaqtastyqty damytý jónindegi kishi komıssııanyń alǵash otyrysy ótti. Eki jaqty kishi komıssııanyń otyrysynda Qazaqstan-Belarýs qarym-qatynasynyń ózekti máseleleri talqylandy.

Osyndaı saýaldardyń biri bizdiń memlekettik organdar tarapynan tolyq pysyqtaýdy qajeti etetin Qazaqstandaǵy «ushqyshsyz ushatyn apparattardy» birlese otyryp óndirý týraly máselege qatysty boldy. Atap aıtqanda, eki el arasyndaǵy yntymaqtastyq týraly «Jol kartasyna» qaramastan, «Qazaqstan Ǵarysh Sapary» UK» AQ bazasynda «ushqyshsyz ushatyn apparattardy» satyp alý jáne olardy óndirýdi uıymdastyrý máselesi bir jarym jyl boıy sheshimin tapqan joq», - dedi senator Tóleýbek Muqashev.

Onyń atap ótýinshe, Belarýs áriptesterdiń aqparatyna qaraǵanda, osy máselege qyzyǵýshylyqty kezekpen Qorǵanys mınıstrligi, Ulttyq qaýipsizdik komıteti, Tsıfrlyq damý, qorǵanys jáne aeroǵarysh ónerkásibi mınıstrligi jáne Qaraǵandy oblysynyń ákimdigi bildirip otyr, mundaı jaǵdaı máseleniń sheshilýin qıyndatady.

«Bizdiń tarapymyzdan atalǵan másele boıynsha biryńǵaı pikirdiń bolmaýy jáne beıqamdyq oryn alyp otyr. Osy jobany iske asyrýdyń bolashaqqa baǵyttylyǵyn jáne basymdyǵyn, sondaı-aq Belarýs tarapynyń yntymaqtastyqqa ázirlikterin eskere otyryp, oryn alǵan jaǵdaıdaǵy máseleniń basyn ashyp, qajet bolǵan jaǵdaıda jobany iske asyrýda tıisti kómek kórsetýdi suraımyz», - dedi senator.