Senatorlar ulttyq qaýipsizdik organdarynyń jumysyn jetildirý máselelerin talqylady

NUR-SULTAN. QazAqparat - QR UQK men UQK Akademııasy basshylyǵynyń qatysýymen Senattyń Halyqaralyq qatynastar, qorǵanys jáne qaýipsizdik komıtetiniń otyrysy onlaın formatta ótti. Otyrys «Qazaqstan Respýblıkasynyń Ulttyq qaýipsizdik organdary – 30 jyl táýelsizdik kúzetinde» taqyrybynda ótti, dep habarlaıdy QazAqparat.

Senattyń beıindi komıtetiniń tóraǵasy Muhtar Qul-Muhammed kezdesýdi asha otyryp, ulttyq qaýipsizdik júıesin jáne arnaıy qyzmetterdiń tıimdi qyzmetin qamtamasyz etý jónindegi zańnamalyq bazany qalyptastyrý men odan ári jetildirý protsesi táýelsizdik alǵan alǵashqy kúnderden bastalǵanyn, sondaı-aq búgingi kúnge deıin jalǵasyp kele jatqanyn atap ótti.

«Sońǵy birneshe jyl ishinde qarsy barlaý qyzmetiniń quqyqtyq negizderin aıqyndaýǵa, terrorızm men ekstremızmge qarsy is-qımyl júıesin jetildirýge, , sondaı-aq basqa da máselelerdi sheshýge baǵyttalǵan birqatar zańdar qabyldandy», - dedi Muhtar Qul-Muhammed.

Senat baspasóz qyzmetiniń málimetinshe, depýtattar QR UQK tóraǵasynyń orynbasary general-maıor Marat Qalqabaevtyń baıandamasyn tyńdady. Ol Parlament depýtattarynyń qoldaýymen «Qazaqstan Respýblıkasynyń arnaýly memlekettik organdary týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń arnaýly memlekettik organdary máseleleri boıynsha ózgerister men tolyqtyrýlar engizý týraly» zańdar qabyldanyp, olar eldiń ulttyq qaýipsizdik organdarynyń júıesin jańa deńgeıge shyǵarǵanyn atap ótti.

UQK Akademııasynyń bastyǵy Tańat Júnisov senatorlardy kásibı, bilikti mamandardy daıarlaýdy maqsat etken oqý ornynyń mıssııasy týraly aıtyp berdi, sondaı-aq bolashaqta Akademııa ulttyq qaýipsizdik organdarynyń bilim berý, oqý-ádistemelik jáne ǵylymı ortalyǵy bolatyn korporatıvtik kópbeıindi joǵary oqý ornyna aınalatynyn jetkizdi.

«Tájirıbege baǵyttalǵan oqý protsesin qamtamasyz etý maqsatynda biz modýldik oqytýdyń ózindik tehnologııasyn engizdik. Onyń negizi retinde bolashaq jumys týraly júıeli túsinik qalyptastyratyn qarsy barlaý protsesi alynyp otyr», - dedi UQK Akademııasynyń bastyǵy.

Otyrys barysynda osy saladaǵy quqyqtyq bazany odan ári jetildirý boıynsha usynystar aıtyldy.