Senatorlar Úkimetke Aýyl sharýashylyǵy jáne azyq-túlik mınıstrligin qurýdy usyndy
Senatordyń pikirinshe, Qazaqstannyń EAEO aıasynda jáne DSU-ǵa kirýine baılanysty aýyl sharýashylyǵy salasynyń tıimdiligin arttyrý kezek kúttirmeıtin másele bolyp otyr. Bul baǵyttaǵy jumysqa memleket tarapynan keshendi qoldaý sharalary qajet. «Úkimet agroónerkásip kesheniniń birqatar baǵytyn qoldaýy kerek dep esepteımiz. Onyń ishinde, aýyl sharýashylyǵy mashınalaryn jasaý, aýyl sharýashylyǵy bankin ashý, koperatsııany damytý arqyly agrosektordyń ónimdiligi men tıimdiligin arttyrý ózekti. Budan bólek, óndirilgen ónimdi daıyndaý, saqtaý, tasymaldaý, satý máselesi de mańyzdy. Tamaq ónerkásibin damytý arqyly azyq-túlik ónimderiniń molshylyǵyn jasap, ony eksporttaý arqyly el qazynasyn toltyrýǵa tıispiz. Osy baǵytta keshendi baǵdarlama qabyldansa ıgi», - deıdi Q. Aıtahanov.
Budan bólek, depýtat aýyl sharýashylyǵynyń áleýeti bolyp esepteletin sýarmaly jerlerdi tolyq ári tıimdi paıdalaný máselesin de alǵa tartty. Onyń aıtýynsha, bul maqsatta respýblıkalyq bıýdjet pen halyqaralyq qarjy ınstıtýttarynan qarajat tartyp, aınalymnan shyǵyp qalǵan jerlerdi, qoldanystaǵy jerlerdi qalpyna keltirý qajet. «Aýylda halqymyzdyń 43 paıyzy turady. Aýyldy damytpaı, aýyl sharýashylyǵyn damytý da múmkin emes. Sondyqtan da, eldi mekenderdi damytý baǵdarlamasyn qabyldap, iske asyrǵan lázim. Aýyldaǵylardyń ómir sapasynyń eń tómengi memlekettik standarttary týraly zań qabyldaýdy usynamyz», - dedi senator.
Budan basqa, depýtat Q.Aıtahanov azyq-túlik baǵasynyń ósýi men elimizge sapasyz ónimderdiń kelýine tosqaýyl qoıyp, halyqty sapaly ónimmen qamtý máselesine de Úkimettiń nazaryn aýdardy. «Bul rette Aýyl sharýashylyǵy mınıstrligine tamaq ónerkásibin damytý, aýyl sharýashylyǵy ónimderin daıyndaý, satý, eksporttaý, baǵasyn úılestirý sekildi máselelerdi júzege asyrý úshin tolyq quzyret berilýi qajet. Ol úshin Aýyl sharýashylyǵy mınıstrligin Aýyl sharýashylyǵy jáne azyq-túlik mınıstrligi etip qaıta qurý máselesi qarastyrylsa», dedi senator. Bul rette depýtat atalǵan jumys birqatar sharalardy, qarjyny talap etetinin aıta kele, ekonomıkanyń kúretamyry sanalatyn aýyl sharýashylyǵyn damytý eldiń shıkizatqa táýelsizdigin arttyratynyna senimmen qaraıtynyn jetkizdi. Depýtattyń kótergen máselesine senator T.Abaıdildın, I.Adyrbekov, E.Astaev, B.Áıtimova, M.Bortnık, M. Baqtııaruly, N.Orazalın, J.Nurǵalıev jáne taǵy da basqalary qoldaý bildirdi.