Senatorlar týrıstik qyzmet máseleleri týraly zań jobasyn qaraıtyn boldy

NUR-SULTAN. QazAqparat - Palata tóraǵasy Máýlen Áshimbaevtyń tóraǵalyq etýimen Bıýrootyrysy boldy. Onda depýtattar 2021 jylǵy 8 sáýirde ótetin Senattyń aldaǵy otyrysynyń kún tártibin talqylady, dep habarlaıdy QazAqparat joǵary jalatanyń baspasóz qyzmetine silteme jasap.

Senatorlar Palatanyń aldaǵy otyrysynda «QazaqstanRespýblıkasynyń Úkimeti men Qyrǵyz Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» zań jobasyn qaraıdy.

Kelisim eki el arasyndaǵy kóshi-qon protsesterin retteý jónindegi málimetter almasýdy ońaılatýǵa múmkindik beredi. Osylaısha, taraptar statıstıkalyq, quqyqtyq jáne ǵylymı-ádistemelik aqparatty, sondaı-aq olardyń aýmaǵyndaǵy eki memlekettiń azamattary týraly málimetterdi almasa alady.

Sondaı-aq Senat depýtattary «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasyn talqyǵa salady.

Elimizde týrıstik basymdyqqa ıe TOP-10 aýmaq belgilenetin bolady.

Eger ınvestorlar ol jerlerde týrıstik obektilerdiń qurylysyn bastaýdy uıǵarsa, onda sol kásipkerlerge jeńildikter beriledi.

Bıýro otyrysy barysynda Májilisten kelip túsken zań jobalary Senattyń turaqty komıtetterine bólinip berildi.