Senatorlar turǵyn úı-kommýnaldyq sharýashylyqty kredıtteý jáne sýbsıdııalaý máselesin qarady

ASTANA. QazAqparat - 5 mamyrda Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytýkomıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine sýmen jabdyqtaý jáne sý burý, turǵyn úı-kommýnaldyq sharýashylyqty kredıtteý jáne sýbsıdııalaý máseleleri boıynsha ózgerister men tolyqtyrýlar engizý týraly» zań jobasy qaraldy.

Qujat sýmen jabdyqtaý jáne sý burý, jylýmen jabdyqtaý salalaryn memlekettik retteý júıesin jetildirý, turǵyn úı-kommýnaldyq sharýashylyqty qarjylyq qoldaý maqsatynda ázirlengen bolatyn.

Jobamen birqatar zańnamalyq aktilerge ózgerister men tolyqtyrýlar engizý kózdelip otyr.

Sý kodeksine quqyqtyq qatynastardy retteıtin jańa uǵymdar engiziledi jáne sýmen jabdyqtaý jáne sý burý salasyndaǵy uıymdastyrý máseleleri reglamentteledi, sonymen qatar eldi mekenniń sýmen jabdyqtaý jáne sý burý júıesin jáne (nemese) olardyń quramdas elementterin ıesiz dep tanýdyń, sondaı-aq olardy esepke alýdyń tártibi bekitiledi.

Sonymen qatar sý tutynýshylardyń sýmen jabdyqtaý jáne sý burý salasyndaǵy quqyqtary men mindetteri naqtylandy, sondaı-aq sýmen jabdyqtaý jáne (nemese) sý burý jónindegi uıymdardyń quqyqtary men mindetteri aıqyndaldy.

Zań jobasymen sýmen jabdyqtaýdyń barlyq kezeńderinde - aýyzsýmen jabdyqtaý kózderin tańdaýdan bastap sý tutynýshylarǵa jetkizgenge deıingi kezeńderde aýyzsýdyń sapasyna qoıylatyn talaptar reglamenttelip, sýdy esepke alýdyń jalpy erejeleri aıqyndaldy.

Jer kodeksine obektiler salý úshin jer ýchaskesin tańdaý aktisin resimdeý kezinde burynnan bar ınjenerlik kommýnıkatsııalardy beriletin jer ýchaskesiniń shekarasynan tys jerge aýystyrý jónindegi normalar engiziledi.

Zań jobasymen Ekologııalyq kodekstiń 225-babyna eldi mekenderdi sýmen jabdyqtaýdy jáne sý burýdy júzege asyrǵan kezde qorshaǵan ortany qorǵaý salasyndaǵy qatynastardy retteý bóliginde ózgerister engiziledi. Sonymen qatar jobamen «Energııa únemdeý jáne energııa tıimdiligin arttyrý týraly», «Memlekettik múlik týraly» jáne «Ruqsattar jáne habarlamalar týraly» Qazaqstan Respýblıkasynyń zańdaryna naqtylaýshy normalar engiziledi.

Bıýdjet kodeksine uzaq merzimdi jáne jeńildikti bıýdjettik kredıtteý, sondaı-aq sýmen jabdyqtaý men sý burýdyń jáne jylýmen jabdyqtaýdyń damýyn ekonomıkalyq yntalandyrý retinde sýbsıdııalaýdy júzege asyrý túrindegi memlekettik qoldaý nysandaryn kózdeıtin normalar engiziledi.

Zań jobasy Palatanyń qaraýyna jiberildi.