Senatorlar Syr óńirinde boldy

NUR-SULTAN. QazAqparat - Naýryz meıramynyń qarsańyńda Qazaqstan Respýblıkasy Parlamenti Senatynyń depýtattary Murat Baqtııaruly men Aqmaral Álnazarova jumys saparymen Qyzylorda oblysynyń, Qarmaqshy, Jalaǵash, Syrdarııa aýdandarynda boldy, dep habarlaıdy QazAqparat.

QR Parlament Senaty baspasóz qyzmetiniń habarlaýynsha, aldymen Qarmaqshy aýdany «Jańajol» JShS-niń qyrmanynda aýdannyń kóktemgi eginge daıyndyq jumystarymen tanysyp, eginge qajetti sý jáne jer úleskerleri máselelerin talqylady.

Senatorlar júzdesýler barysynda aqpan aıynda Úkimet basshysyna joldaǵan depýtattyq saýaldarynda Syrdarııa ózeniniń kúrt tómendep ketkendigi jáne tıisti sharalar qabyldaý qajettigi aıtylǵany týraly habardar etti. Aqpan aıynda Úkimet basshysy Ózbekstan Respýblıkasyna baryp, Prezıdentimen kezdeskende «Syrdarııa ózeni basseınindegi sý sharýashylyǵy jaǵdaıyna jáne Qazaqstan Respýblıkasynyń ońtústiktegi óńirlerindegi sýarmaly jerlerdi vegetatsııalyq kezeńde sýmen qamtamasyz etý» máselesine erekshe nazar aýdarylyp, eki jaqty kelissózder ótkizgen bolatyn.

Senatorlar sondaı-aq aýdandyq ortalyq aýrýhananyń jumysymen tanysyp, jańa apparattarmen jáne tolyq dári-dápmekpen qamtamasyz etilý, telmedıtsına, sanavııatsııa jelisin tıimdi paıdalaný jáne odan ári damytý jolyn qarastyrý tóńireginde áńgime qozǵady.

Jalaǵash aýdanyndaǵy «Agro Holdıng Qyzylorda» JShS ǵımaratynda sharýashylyq basshylarymen kezdesip, kóktemgi egis naýqanyndaǵy sýbsıdııa men tyńaıtqyshtardyń der kezinde jetkizilýi máseleleri de sóz boldy. Keıin senatorlar jańadan salynǵan 100 tósektik aýdandyq aýrýhanaǵa baryp, medıtsına qyzmetkerlerimen, patsıenttermen sóılesip pikir almasty.

Sapardyń sońyna qaraı Syrdarııa aýdanynyń «Ýglesbyt» JShS-niń kúrish aqtaý zaýytynyń jumysymen tanysyp, sharýashylyq basshylarymen jáne máslıhat depýtattarmen kezdesti. Shirkeıli aýyldyq okrýgindegi appattyq jaǵdaıdaǵy feldsherlik-ambýlatorııalyq pýnktiniń jaǵdaıyn kórip, depýtattar FAP-tyń tynys-tirshiliginiń problemalyq jaqtaryna, medıtsınalyq qyzmet kórsetý júıesiniń máselelerine de alańdaýshylyq bildirdi.

Syr óńirindegi kezdesýler barysynda Memleket basshysy Qasym-Jomart Toqaevtyń Qazaqstan halqyna «Jańa Qazaqstan: Jańarý men jańǵyrý joly» atty joldaýynyń negizgi baǵyttary men saıası reformalary boıynsha elimizdiń jańa baǵytta órkendeýi týraly derekter aıtylyp, jurtshylyq jan-jaqty habardar etildi.

Senatorlar kezdesýde turǵyndardyń barlyq ótinishterin tyńdap, memleket tarapynan elimizdegi bilim berý, densaýlyq saqtaý, kásipkerlikti damytý, sybaılas jemqorlyqpen kúres, quqyq qorǵaý organdarynyń jumysyn jetildirý, memlekettik qyzmettiń tıimdiligin kóterý sııaqty kúndelikti ómirdegi máselelerge erekshe mán berilip otyrǵandyǵyn jetkizdi.

Senatorlardyń Syr óńirindegi kezdesýleri jaqsy ótip, óńir turǵyndarynyń kókeıkesti problemalyq máseleleri qolǵa alynatyny jáne aldaǵy ýaqytta Senat qabyrǵasynda Úkimet músheleriniń aldyna shyǵarylatyny týraly aıtyldy.