Senatorlar sot júıesin odan ári reformalaý týraly zań jobalaryn qaraıdy

NUR-SULTAN. QazAqparat – Senat Tóraǵasy Máýlen Áshimbaevtyń tóraǵalyǵymen ótken Bıýro otyrysynda depýtattar 9 jeltoqsan kúni palata otyrysynda qaralatyn máselelerdi bekitti, dep habarlaıdy QazAqparat.

Senattyń kezekti otyrysynyń kún tártibine «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zańynyń jobasy jáne «Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» zań jobasy birinshi oqylymda engizildi.

Zańnamalyq ózgerister sot óndirisine IT-servısterdi engizý, sýdıa kadrlaryn konkýrstyq irikteýdi júrgizýge qosymsha talaptar engizý, sondaı-aq sot júıesin qarjylandyrýdyń jańa úlgisin engizý máselelerine qatysty bolyp otyr.

Senatorlar «Qazaqstan Respýblıkasynyń keıbir zańnamalyq aktilerine azamattyq protsestik zańnamany jetildirý jáne daýlardy sottan tys jáne sotqa deıingi retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zań jobasyn da birinshi oqylymda qaraıdy.

Osy zań jobasy boıynsha medıatorlar uıymynyń negizgi mindetteri men ýákiletti organnyń quzyreti aıqyndaldy. Medıatordyń quqyqtary men mindetteri naqtylandy. Onlaın-medıatsııany damytýǵa baǵyttalǵan túzetýler de qarastyrylǵan.