Senatorlar Shymkent qalasyndaǵy áleýmettik nysandardy aralady
Parlamentshiler balalarǵa arnalǵan «Qamqorlyq» arnaýly áleýmettik qyzmet kórsetý ortalyǵynyń jumysymen tanysty. Olar munda ońaltý ortalyǵynyń mamandarymen jáne osynda keletin balalardyń ata-analarymen kezdesti. Senatorlar kezdesý barysynda Parlamentte qabyldanǵan zańdar, áleýmettik salany damytý jáne múgedek azamattarǵa arnalǵan aýqymdy memlekettik sharalar týraly aıtyp berdi.
«Parlament jaqynda Múgedekterdiń quqyqtary týraly konventsııaǵa Fakýltatıvtik hattamany ratıfıkatsııalady. Onyń erejeleri múgedektik kórinisi boıynsha kemsitýshilikti joıýǵa jáne ınklıýzıvtik qaǵıdany iske asyrýǵa baǵyttalǵan. Inklıýzıvti qoǵam qurý úshin erekshe balalardy kúndelikti áleýmettik ómirge daıyndaýymyz kerek, ol úshin osyndaı ońaltý ortalyqtaryn ashý asa mańyzdy», – dedi senator Aıgúl Qapbarova.
Depýtattar sonymen qatar «Shymqala» tarıhı-mádenı kesheninde boldy. Oqýshylar saraıy qurylysynyń barysymen jáne Turan shaǵyn aýdanyndaǵy 29 kvartaldyń ınjenerlik ınfraqurylymymen tanysty.
Nurlan Beknazarov pen Aıgúl Qapbarova Shymkenttegi Saıram turǵyn alabynyń turǵyndarymen de kezdesti. Júzdesýge qatysýshylar joldardy jóndeý, ınfraqurylymdy damytý, abattandyrý jáne aýyz sýmen qamtamasyz etýdiń ózekti máselelerin talqylady.