Senatorlar shaǵyn bızneske salyqty azaıtý týraly zań jobasyn qaraıdy

ASTANA. QazAqparat - Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda depýtattar 24 qarashaǵa josparlanǵan Senat otyrysynyń kún tártibin bekitti, dep habarlaıdy QazAqparat.

Aldaǵy palata otyrysynda depýtattar «Salyq jáne bıýdjetke tólenetin basqa da mindetti tólemder týraly» kodekske (Salyq kodeksi) jáne osy kodeksti qoldanysqa engizý týraly zańǵa ózgerister men tolyqtyrýlar engizý týraly zań jobasyn qaraıdy.

Usynylǵan túzetýlerdiń qatarynda eńbekaqy tóleý qoryna júktemeni azaıtý jáne biryńǵaı tólemdi engizý týraly norma bar. Naqty aıtqanda, qazir mıkro jáne shaǵyn bıznes sýbektileri eńbekaqy tóleý qorynan 34,5 paıyz tóleıdi. Al 2023 jyldan bastap birtindep 2028 jylǵa deıin 26,3 paıyzǵa deıin óse otyryp, 20 paıyzdyq biryńǵaı tólemdi erikti negizde tóleý usynylady.

Sonymen qatar Senat otyrysynda «Qazaqstan Respýblıkasynyń keıbir zańnamalyq aktilerine kólik jáne jer qoınaýyn paıdalaný máseleleri boıynsha ózgerister men tolyqtyrýlar engizý týraly» zań jobasy qaralady. Bul qujat joldardaǵy kóliktik baqylaýdy avtomattandyrý bóliginde ózgeristerdi, teńiz kóligi salasyndaǵy halyqaralyq sharttardyń normalaryn ımplementatsııalaýdy, temir jol kóligindegi oqıǵalardy, kemelerge qatysty apattyq jaǵdaılardy jáne azamattyq avıatsııany tergeý tártibin jetildirýdi kózdeıdi.

Foto: senate.parlam.kz