Senatorlar Respýblıkalyq ǵaryshtyq baılanys ortalyǵynyń jumysymen tanysty
Senat komıtetiniń tóraǵasy Andreı Lýkın óz sózinde Memleket basshysy Qasym-Jomart Toqaev «Digital Bridge» tehnologııalyq forýmynda sóılegen sózinde 2025 jylǵa deıin elimizdiń barlyq oblys ortalyqtaryn, jańa býyndy uıaly baılanyspen qamtý jónindegi jumysty merziminen buryn aıaqtaý mindetin Úkimet aldyna qoıǵanyn atap ótti.
«Elimizdiń Prezıdenti aýdan men aýyl turǵyndarynyń ınternetke qol jetkizýdi qamtamasyz etý mindetin qoıǵan bolatyn. Osy maqsatqa jetý úshin tómen orbıtadaǵy jer serigi júıeleriniń múmkindikterin paıdalanýǵa basa nazar aýdarylyp otyr. Sonymen qatar qajet bolǵan jaǵdaıda zańnamaǵa ózgerister engizý jóninde bastama kóteretin bolamyz. Memlekettik jáne korporatıvtik qajettilikterge oraı joǵary talaptardy oryndaýda aqparatty berýdiń senimdi tásili bolyp qalatyn geostatsıonarlyq jer serikteriniń mańyzdylyǵyn atap ótken jón», - dep atap ótti Andreı Lýkın.
«Respýblıkalyq ǵaryshtyq baılanys ortalyǵy» AQ Basqarma tóraǵasy Málik Júıriktaev óz sózinde ǵaryshtyq baılanys salasynda júrgizilip jatqan jumystar týraly aıtyp berdi. Máselen, ol búgingi tańda Qazaqstanda «KazSat» serııaly óziniń ǵaryshtyq baılanys júıesi jumys istep turǵanyn, onyń quramynda eki jer serigi men ǵarysh apparattaryn basqarýdyń eki jer ústi kesheni – «Aqkól» jáne «Kókterek» ǵaryshtyq baılanys ortalyǵy bar ekenin jetkizdi.
Qatysýshylar is-shara barysynda tsıfrlyq teńsizdikti eńserý, tsıfrlyq qyzmetterdi eksporttaý, qoldanystaǵy spýtnıkterdi paıdalaný, jerdi qashyqtyqtan zondtaý jáne basqa da máselelerdi talqylady.
Senator Andreı Lýkın kóshpeli otyrysty qorytyndylaı kelip, aıtylǵan usynystar eskeretinin jáne salany jetildirý jónindegi depýtattyq korpýstyń usynymdary tıisti memlekettik organdar men Úkimetke jiberiletinin atap ótti. Parlamentshiler de qoldanystaǵy zańnamany jetildirýge járdemdesýge daıyn.