Senatorlar: Prezıdent memlekettilik pen eldiń birligin saqtap qaldy

NUR-SULTAN. QazAqparat – Eldegi áleýmettik-ekonomıkalyq jaǵdaıǵa baılanysty azamattardyń beıbit sherýin qylmystyq toptar óz múddeleri úshin paıdalandy. Osy áreketterdiń nátıjesinde kinásiz adamdar zardap shekti dep sanaıdy senator Álı Bektaev, dep habarlaıdy QazAqparat tilshisi.

Depýtat bul týraly Senattyń jalpy otyrysynda Úkimet basshysynyń orynbasary Eraly Toǵajanovtyń atyna jazylǵan saýalynda aıtyp, óz pikirin bildirdi.

«Bıylǵy jyl elimiz úshin kúrdeli ahýalmen bastaldy. Bul oqıǵa halyqqa da, bılikke de úlken sabaq boldy. Qıyn-qystaý shaqta jaǵdaıdy baqylaýda ustaýǵa mindetti memlekettik organdardyń qaýqarsyzdyq tanytqanyn kórdik. Memlekettiń Táýelsizdigi men bolashaǵyna qaýip tóngen sondaı qysyltaıań kezde Prezıdentimiz Qasym-Jomart Kemeluly Toqaev el taǵdary barlyq jaýapkershilikti óz moınyna alyp, ýaqtyly ári batyl strategııalyq sheshimder qabyldady. Eń bastysy, Prezıdentimizdiń batyl sheshimderiniń arqasynda memlekettigimiz ben elimizdiń tutastyǵyn saqtap qaldyq. Memleket basshysy barlyq jaǵdaıdy ashyp aıtyp, teledıdar arqyly halyqqa der kezinde birneshe úndeý jarııalap, ashyq aqparattyq saıasat ustandy»,-delingen birqatar senatorlar daıyndaǵan depsaýalda.

Á. Bektaev qazirgi ýaqytta Prezıdent Úkimet aldyna Jańa Qazaqstandy qurýǵa baǵyttalǵan naqty mindetter qoıǵanyn eske saldy. Senator bul baǵytta ulttyq ıdeologııany qalyptastyrý kerek dep sanaıdy, onyń basymdyqtarynyń biri jastarmen jumysty kúsheıtý bolýy tıis. Sol qańtar kúnderi alańǵa jastar shyqty, olardyń kópshiligi destrýktıvti kúshterdiń arandatýyna boı aldyrdy, dep atap ótti senator.

Jastar saıasaty zaman talabynan da, jastar talabynan da qalyp otyrǵanyn aıtty. Senator jastar saıasatyn formalızmnen aryltyp, olardy tárbıeleý máselesimen tyńǵylyqty aınalysý, elimizde ruqsat etilmegen destrýktıvti dinı aǵymdarmen kúresýdiń naqty sharalaryn qolǵa alý mańyzdy ekenin jetkizdi.

Jedel sheshýdi talap etetin problemalardyń biri - óskeleń urpaq arasyndaǵy jumyssyzdyq. Senator óziniń depýtattyq saýalynda bul máseleni sheshý úshin de pármendi sharalar qabyldaý qajettigin atap ótti.

«Úkimettiń jyl saıynǵy esepterine qarap otyrsaq, ár óńirde myńdaǵan jumys oryndary ashylyp jatady. Túrli memlekettik baǵdarlamalardyń nátıjesinde kóptegen kásiporyndar ashylyp, júzdegen adam jumyspen qamtyldy degen jańalyqtardy da estımiz. Biraq jastar arasyndaǵy jumyssyzdyq kóbeımese, azaımaı otyr. Sondyqtan Úkimet jumyssyzdyqty joıý isinde jalǵan esepke júginbeı, naqty isterge kóshýi qajet», - dedi Álı Bektaev.