Senatorlar osy aptada qandaı zańdardy qaraıdy

<p><strong>ASTANA. KAZINFORM — Senat spıkeri Máýlen Áshimbaevtyń tóraǵalyǵymen palata bıýrosynyń otyrysy ótti. Onda depýtattar osy aptaǵa josparlanǵan is-sharalardy pysyqtap, 18 sáýir kúni ótetin Senat otyrysynyń kún tártibin bekitti. </strong></p>

Soǵan sáıkes palatanyń aldaǵy otyrysynda QR keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly zań ekinshi oqylymda qaralady.

Depýtattar bastamashy bolǵan bul qujat halyqtyń kóshi-qony jáne qylmystyq-atqarý júıesi salasyndaǵy zańnamany jetildirýdi kózdeıdi.

Buǵan deıin aıtylǵandaı, zańda óńirlerge qonys aýdarýshylar úshin jaǵdaı jasaýǵa, «qandas» mártebesin berý rásimin jetildirýge arnalǵan ózgerister jáne taǵy basqa túzetelýer bar.

Sonymen qatar senatorlar palata otyrysynda QR Úkimeti men Túrkııa Respýblıkasynyń Úkimeti arasyndaǵy halyqaralyq quramdastyrylǵan júk tasymaldary týraly kelisimdi ratıfıkatsııalaý týraly zańdy qaraıdy.

Kelisim kóliktiń ártúrli túrlerin paıdalana otyryp, halyqaralyq júk tasymaldaryn jeńildetýge, sondaı-aq, Qazaqstan men Túrkııa arasyndaǵy tranzıttik-kóliktik áleýetti jáne saýda-ekonomıkalyq qatynastardy damytýǵa baǵyttalǵan.

Aldaǵy beısenbide depýtattar QR keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly zańdy da qaraıdy.

Atalǵan zań ǵalymdar úshin áleýmettik kepildikterdi jaqsartýǵa jáne ǵylymdaǵy qarjylyq resýrstardy paıdalanýdy ońtaılandyrýǵa arnalǵan.