Senatorlar ornyqty damý máseleleri jónindegi komıssııanyń kún tártibin bekitti

<p>Senat spıkeriniń orynbasary Olga Perepechınanyń tóraǵalyq etýimen Ornyqty damý salasyndaǵy ulttyq maqsattar men mindetterdiń iske asýyna monıtorıng júrgizý jónindegi parlamenttik komıssııanyń jumys keńesi ótti. Kún tártibi boıynsha komıssııanyń aldaǵy ýaqytta Shyǵys Qazaqstan oblysy Óskemen qalasynda ótetin kóshpeli otyrysy aıasyndaǵy ekologııa máseleleri talqylandy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Otyrysqa parlamenttik komıssııanyń músheleri, memlekettik organdardyń ókilderi, onyń ishinde Shyǵys Qazaqstan oblysy ákimdiginiń basshylyǵy men máslıhat depýtattary, halyqaralyq uıymdar men sarapshylar qaýymdastyǵynyń ókilderi qatysty. Atap aıtqanda, BUU-nyń Qazaqstandaǵy Damý Baǵdarlamasy men Ekonomıkalyq zertteýler ınstıtýtynyń sarapshylary sóz sóıledi.

Palata tóraǵasynyń orynbasary óz sózinde aýanyń lastanýynan týyndaıtyn problemalardyń qaýpine nazar aýdardy jáne komıssııanyń aldaǵy jumysyndaǵy birqatar negizgi mindetterdi belgiledi.

«Ornyqty damý maqsattarynda 2030 jylǵa qaraı qalalardaǵy teris ekologııalyq áserdi azaıtý, onyń ishinde aýa sapasyna erekshe nazar aýdarý jáne qorshaǵan ortaǵa teris áserdi tómendetý mindeti belgilendi. 2022 jyly Qazaqstanda aýanyń lastanýyna monıtorıng júrgizilgen 69 eldi mekenniń 30-y joǵary jáne óte joǵary lastaný dárejesine jatady. Bul ásirese ónerkásip sektoryndaǵy ınfraqurylymy damyǵan jáne kólik magıstrali bar óńirlerge qatysty. Olardyń qataryna Óskemen qalasy da kiredi», - dep atap ótti Olga Perepechına.

Senator atap ótkendeı, osyǵan baılanysty birinshi kezektegi mindet – taý-ken jáne metallýrgııa salasy kásiporyndarynyń qyzmetine monıtorıng júrgizý bolyp tabylady. Óndiris qaldyqtarynyń shyǵaryndylary men kádege jaratý deńgeıin tómendetý jónindegi tetikti muqııat pysyqtaý qajet.

Senat spıkeriniń orynbasary jergilikti atqarýshy organdardy taǵy bir mańyzdy baǵytqa – jeke sektorǵa gaz jetkizý, qoldanystaǵy jylý elektr ortalyqtaryn jańǵyrtý men jetildirýge nazar aýdarýǵa shaqyrdy.

Ekologııa jáne tabıǵı resýrstar mınıstriniń orynbasary Mansur Oshýrbaev óz kezeginde áriptesterin sala boıynsha ODM-niń mindetterin iske asyrý barysymen tanystyryp, osy baǵyttaǵy birlesken jumysqa qatysty usynystaryn aıtty.

Oblystyń mamandandyrylǵan tabıǵat qorǵaý prokýrory Aleksandr Akýlov ShQO-da tabıǵatty qorǵaý zańnamasynyń qandaı buzýshylyqtary jıi kezdesetini jáne olardy azaıtý úshin qandaı sharalar qoldaný kerektigi týraly baıandady.

Ekonomıkalyq zertteýler ınstıtýtynyń basqarma tóraǵasy Rýslan Sultanov júrgizilgen saraptamalar men ǵylymı-tájirıbelik zertteýlerdiń nátıjelerine toqtala kelip, strategııalyq sıpattaǵy úrdisterdi atap ótti. Sarapshynyń pikirinshe, máseleni sheshý barlyq múddeli taraptardyń keshendi sharalardy ýaqtyly qabyldaýyna baılanysty.

Jumys keńesiniń qorytyndysy boıynsha parlamenttik komıssııanyń kezekti otyrysyna daıyndyq aıasynda jumysqa qabyldanatyn ózekti máseleler men usynymdar barysy aıqyndaldy.