Senatorlar óńirlerge sapar barysynda 300-ge jýyq kezdesý ótkizdi
Soǵan sáıkes depýtattar aldaǵy beısenbide «Birikken Ulttar Uıymynyń medıatsııa nátıjesinde qol jetkizilgen halyqaralyq tatýlasý kelisimderi týraly konventsııasyn ratıfıkatsııalaý týraly» zań jobasyn qaraýdy josparlap otyr.
Bul Konventsııa halyqaralyq kommertsııalyq kelisimderdi saqtaý kepildikterin kúsheıtedi. Sondaı-aq medıatsııa arqyly halyqaralyq kommertsııalyq daýlardy retteý jónindegi sharttyq-quqyqtyq bazany nyǵaıtýǵa tıisti jaǵdaılar jasaıdy.
Sonymen qatar Bıýro otyrysynda senatorlardyń 18-25 naýryz aralyǵynda óńirlerge jasaǵan saparlarynyń qorytyndysy tyńdaldy. Bul saparlardyń basty maqsaty halyqpen kezdesip, jergilikti jerlerdegi ahýalmen tanysyp, Prezıdent Joldaýynda aıtylǵan basymdyqtardy, qolǵa alynǵan reformalardy jáne qabyldanǵan zańdardy talqylaý boldy. Osy rette elimizdiń barlyq óńirine barǵan Senat depýtattary 300-ge jýyq kezdesý ótkizip, shalǵaı aýyldar men eldimekenderge de arnaıy at basyn burǵanyn atap ótken jón.
Kezdesýler barysynda azamattar azyq-túlik baǵasynyń ósýine, halyqtyń tabysyn arttyrýǵa, jumyspen qamtýǵa, avtomobıl joldarynyń sapasyna, jaıylym jerlerdiń tapshylyǵyna, aýyz sýmen qamtamasyz etýge jáne basqa da mańyzdy máselelerge qatysty ózekti problemalardy kóterdi.
Bıýro otyrysynyń qorytyndysy boıynsha Senat tóraǵasy Máýlen Áshimbaev depýtattarǵa halyqty alańdatqan bul problemalardy baqylaýǵa alyp, muqııat zerttep, olardy sheshý úshin tıisti jumystardy qolǵa alýdy tapsyrdy.
Sondaı-aq Bıýro músheleri «Qazaqstan Respýblıkasynyń Úkimeti men Túrki Akademııasy arasyndaǵy Túrki Akademııasyn ornalastyrýdyń sharttary men tártibi týraly kelisimdi ratıfıkatsııalaý týraly», «Qazaqstan Respýblıkasynyń bıologııalyq qaýipsizdigi týraly» jáne «Qazaqstan Respýblıkasynyń keıbir zańnamalyq aktilerine bıologııalyq qaýipsizdik máseleleri boıynsha ózgerister men tolyqtyrýlar engizý týraly» zań jobalaryn jumys úshin Áleýmettik-mádenı damý jáne ǵylym komıtetine berdi.