Senatorlar múgedektigi bar adamdardy qoldaýǵa arnalǵan zań jobasyn ázirledi
Onda múgedektigi bar adamdardyń ómir súrý sapasyn jaqsartýǵa arnalǵan zań jobasy kópshilikke tanystyryldy. Senatorlar bastamashy bolǵan bul zań jobasyn bir top Parlament depýtaty ázirledi, dep habarlaıdy QazAqparat QR Parlamenti Senatynyń baspasóz qyzmetine silteme jasap.
«Memleket basshysy múgedektigi bar adamdardy áleýmettik qorǵaýǵa únemi basa mán berip keledi. Osy saladaǵy ulttyq zańnamany jetildirý isi de Prezıdentimizdiń tapsyrmasy boıynsha qolǵa alyndy», – dedi jıyndy ashqan Máýlen Áshimbaev.
Sondaı-aq Senat tóraǵasy ókinishke qaraı elimizde erekshe qajettiligi bar adamdardyń azaımaı otyrǵanyn, sondyqtan olarǵa zańnamalyq turǵydan qoldaý kórsetýdiń mańyzy zor ekenin aıtty. Osyǵan oraı depýtattar zań jobasynda aýrýdyń aldyn alý, medıtsınalyq qyzmettiń jáne bilimniń qoljetimdiligi men sapasyn arttyrý sııaqty naqty sharalar usynyp otyr.
«Qazirgi tańda elimizde múgedektigi bar 700 myńǵa jýyq adam turady. Ókinishke qaraı, jyl saıyn 50 myńnan astam azamat alǵash ret múgedektigi bar adam dep tanylady. Bul az kórsetkish emes. Sonyń ishinde balalar arasyndaǵy múgedektik bizdi erekshe alańdatady. Munyń bári densaýlyq saqtaýdy jáne aýrýdyń aldyn alýdy damytý kerektigin kórsetedi. Erekshe qajettiligi bar azamattar úshin medıtsınalyq qyzmetterdiń jáne bilim berýdiń qoljetimdiligi men sapasyn arttyrý sharalaryn da odan ári kúsheıtý mańyzdy», – dedi Máýlen Áshimbaev.
Byltyr atalǵan zań jobasyn daıyndaý úshin Senat janynan arnaıy jumys toby qurylǵan edi. Onyń quramyna 55 adam endi. Olardyń qatarynda Parlament depýtattary, memlekettik organdardyń, úkimettik emes jáne halyqaralyq uıymdardyń ókilderi, sondaı-aq, múgedektigi bar adamdar bar. Jumys toby elimizde múmkindigi shekteýli adamdardyń ómir súrý sapasyn arttyrý úshin 500-den astam usynys ázirledi.
«Bul qujat múgedektigi bar adamdardyń ómir súrý sapasyn jaqsartý máseleleri boıynsha jumysty júıeli túrde qoldaýǵa arnalǵan. Osyǵan oraı zań jobasyna olardy áleýmettik qorǵaýǵa qatysty naqty normalar engizilip otyr. Sonymen qatar densaýlyq saqtaý, arnaýly áleýmettik qyzmetter, bilim berý baǵytyndaǵy birqatar ulttyq zańnamany jetildirýdi kózdeıdi», – dedi Senat tóraǵasy.
Jumys tobynyń jetekshisi, senator Aqmaral Álnazarovanyń aıtýynsha, zań jobasy múmkindigi shekteýli azamattar kúndelikti kezdesetin naqty problemalardy sheshýge baǵyttalǵan.
Mysaly, buryn múgedektigi bar balany shıpajaı-kýrorttarda tegin emdeý kezinde onymen birge erip júretin adam joldamanyń qunyn óz qarajatynan tóleýge tıis edi. Eger erip júretin adamnyń tóleıtin qarjysy bolmasa, bala da shıpajaı-kýrortta tegin emdelýden qaǵylýǵa májbúr bolady. Osyǵan oraı senatorlar erip júretin adam úshin joldama qunynyń 70 paıyzyn óteýdi usynyp otyr. Bul ońaltý sharalarynyń qoljetimdiligin qamtamasyz etýge jáne jyl saıyn 13 myńnan astam adamdy qosymsha qamtýǵa múmkindik beredi.
Jumys tobynyń taǵy bir naqty usynysy 3-toptaǵy múgedektigi bar bar adamdar úshin jeke notarıýstardan notarıattyq qyzmetterdi tegin alýǵa jaǵdaı jasaý. Budan basqa, eger estý jáne kórý qabileti boıynsha múgedektigi bar azamattar sot otyrystaryna qatysqan kezde olarǵa ymdaý tilin, Braıl álipbıin biletin aýdarmashynyń qyzmetterin tegin usyný, sondaı-aq, sýrdotehnıkalyq, tıflotehnıkalyq quraldardy paıdalaný sııaqty erejeler jazylǵan. Zań jobasynyń bastamashylary kedergisiz orta qalyptastyrý úrdisin jedeldetý úshin qalalyq marshrýttarǵa jolaýshylar kóligin satyp alǵan kezde múgedektigi bar adamdarǵa beıimdelgen avtobýstarǵa basymdyq berý normasyn usyndy. Sondaı-aq bastamashylardyń usynysyna sáıkes taksoparkterdegi árbir onynshy kólik ınvotaksı bolýǵa tıis.
Іs-shara barysynda múmkindigi shekteýli azamattardy jumysqa ornalastyrý, olardy turǵyn úılermen, sapaly bilimmen qamtamasyz etý jáne balalardyń aǵzasyna zııandy, múgedektikke ákelip soǵýy múmkin ónimderdi qoldanýǵa úndeıtin jarnamalarǵa tyıym salý máseleleri de talqylandy.
Kezdesýge Premer-Mınıstrdiń orynbasary Eraly Toǵjanov, salalyq mınıstrlikterdiń, memlekettik organdardyń, úkimettik emes uıymdardyń basshylary jáne osy másele boıynsha belsendiligimen tanylyp júrgen múgedektigi bar azamattar qatysty.
Jıyndy qorytyndylaǵan Senat Tóraǵasy Máýlen Áshimbaev zań jobasyn ázirlegen jumys tobynyń múshelerine alǵysyn bildirdi. Sondaı-aq ol zańnamany odan ári jetildirý, múgedek adamdardyń ómir súrý sapasyn arttyrý jáne olarǵa óz áleýetin iske asyrýǵa barynsha jaǵdaı jasaý úshin tıisti jumysty ári qaraı jalǵastyra berýdiń mańyzdy ekenin aıtty.