Senatorlar memlekettik organdar aldynda elimizdiń shekaralas aýdandary turǵyndarynyń problemasyn kóterdi

<p>ASTANA. KAZINFORM &ndash; Senat Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary múddeli memlekettik organdarmen jumys kezdesýin ótkizdi.</p>

Onda Shyǵys Qazaqstan oblysy Marqakól aýdanyn damytý máseleleri talqylandy, dep habarlaıdy QR Parlamenti Senatynyń baspasóz qyzmeti.

Komıtet hatshysy Olga Býlavkına kezdesýdi asha kelip, 2023-2027 jyldarǵa arnalǵan aýyldyq aýmaqtardy damytý tujyrymdamasyna sáıkes shekara mańyndaǵy eldi mekenderdi damytýǵa erekshe nazar aýdarylyp otyrǵanyn atap ótti.

«Tujyrymdamany iske asyrý aıasynda halyqtyń ketýin azaıtý, adamdardyń ómir súrýine qolaıly jaǵdaı jasaý jáne tutastaı alǵanda shekara mańyndaǵy aýdandardyń ekonomıkalyq damýyna jańa serpin berý josparlanýda. Bul aýmaqtardyń problemalary asa mańyzdy, óıtkeni olar ómirdiń barlyq salalaryn qamtıdy. Búgingi tańda Úkimet tarapynan júrgizilip jatqan barlyq jumystarǵa qaramastan, bul aýmaqtarda sheshilmegen máselelermen qatar jańa qaýip-qaterler paıda boldy», - dedi senator.

Kezdesý barysynda aýyl aýdandarynan halyqtyń ketýin azaıtý jáne jańa turǵyndardy tartý úshin yntalandyrý tetikteri, sondaı-aq jaıly ómir súrý jaǵdaılaryn qamtamasyz etý jáne bıznesti damytý úshin shekara mańyndaǵy aýmaqtarda ınfraqurylymdy damytýǵa ınvestıtsııa tartý máselesi talqylandy. Kezdesýge qatysýshylar óńirdiń ekonomıkalyq áleýetine de toqtaldy. Onyń ishinde aýyl sharýashylyǵyn qoldaý arqyly shekara mańy aýdandarynyń ekonomıkalyq damýyn yntalandyrý jáne shekara mańy aýmaqtarynda kásipkerlik belsendilikti kótermeleýde memlekettik qoldaý kórsetý múmkindikteri týraly aıtyldy.