Senatorlar memlekettik qaryz máselesin taǵy kóteredi

NUR-SULTAN. QazAqparat – Depýtattar memlekettik qaryz máselesin qarastyrady. Bul týraly Senat tóraǵasy máýlen Áshimbaev aıtty, dep habarlaıdy QazAqparat tilshisi.

Búgin Senattyń jalpy otyrysynan keıin tilshiler Senat tóraǵasynan memlekettik qaryzdyń ósýi máselesine qatysty suraq qoıdy.

Óz kezeginde M. Áshimbaev Qazaqstannyń memlekettik qaryzy óte mańyzdy másele ekenin atap ótti.

«Ózderińiz bilesizder, biz ótken jyly memlekettik qaryz máselesin egjeı-tegjeıli kóterip, osy baǵyttaǵy kemshilikterdi synǵa alǵan edik. Sol kezde Úkimet qalyptasqan ahýaldy baqylaýǵa alatynyna ýáde bergen edi. Qazir bıýdjetti qarastyrý aıasynda bul máseleni taǵy da qarastyramyz», - dedi Senat tóraǵasy.

Eske sala keteıik, 20 sáýirde Májilis «2022-2024 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn maquldap, Senattyń qaraýyna joldady.

2022 jylǵa arnalǵan respýblıkalyq bıýdjetti naqtylaý týraly zań jobasy usynylyp otyr. Zań jobasy Memleket basshysynyń aǵymdaǵy jyldyń basynda bergen tapsyrmalaryn jáne memlekettiń basqa da shuǵyl mindettemelerin iske asyrýǵa baǵyttalǵan. Atalǵan baǵyttar boıynsha bıýdjet shyǵystary 2,7 trln teńgege artyp otyr.

Budan buryn habarlanǵandaı, jaqynda depýtat Nurlan Bekenov Senat otyrysynda syrtqy memlekettik qaryzdardyń turaqty ósýine alańdaýshylyǵyn bildirdi.

Qarjy mınıstrliginiń aqparatyna sáıkes, 2022 jylǵy 1 qańtardaǵy jaǵdaı boıynsha memlekettik qaryz 22 trln teńgege nemese JІÓ-niń 27,4%-yna jetti.