Senatorlar: Memleket qorǵanys ónerkásibi kásiporyndaryn baqylaýdy saqtaýy kerek

NUR-SULTAN. QazAqparat - Senatorlar Asqar Shákirov pen Sergeı Ershov Premer-Mınıstri Asqar Mamınniń atyna joldaǵan depýtattyq saýalynda elimizdiń halqy men aýmaǵynyń qaýipsizdigin qamtamasyz etetin keıbir memlekettik nysandardy jekeshelendirýge qatysty problemalardy atap ótti, dep habarlaıdy QazAqparat tilshisi.

Depýtattar Memleket basshysy óz Joldaýynda Úkimetke jekeshelendirýdiń jańa josparyn qabyldaýdy tapsyrǵanyn atap ótti. Osyǵan baılanysty parlamentshiler elimizdiń qorǵanys-ónerkásiptik áleýetine yqpal etetin kez kelgen uıymdardy jekeshelendirýde memlekettiń úlesin saqtaý nemese osyndaı uıymdardyń «altyn aktsııasyn» satyp alý arqyly júrgizilýi qajettigi týraly zańnamalyq túzetýler engizýdi usyndy.

«Jekeshelendirý memlekettiń ekonomıkaǵa qatysýyn qysqartý jáne problemalyq kompanııalardaǵy jaǵdaıdy jaqsartý maqsatyn kózdeıtini daýsyz. Sonymen qatar, memlekettik kásiporyndardy jekeshelendirý jáne memlekettiń óz azamattary men jalpy júıeniń qaýipsizdigin tikeleı qamtamasyz etetin uıymdarǵa qatysý táýekelin memleket tarapynan baǵalaý, baqylaý jáne basqarý qajet dep sanaımyz», - dep senatorlar óz oılaryn ortaǵa saldy.

Senat depýtattary osyǵan baılanysty jekeshelendirilgen kásiporyndardyń portfelin ártaraptandyrý múmkindigin, sondaı-aq osy protsesti normatıvtik-quqyqtyq retteýdi jetildirý qajettigin Úkimet basshysynan keshendi túrde qarastyrýdy surady.