Senatorlar mal sharýashylyǵyn damytýǵa jańa serpin beretin qujatty talqylady

NUR-SULTAN. QazAqparat - Senat depýtattary Eýrazııalyq ekonomıkalyq odaq aıasynda aýyl sharýashylyǵyndaǵy asyl tuqymdy malǵa selektsııa jumystaryn birizdendirý sharalary týraly kelisimdi ratıfıkatsııalaýdy talqylady. Bul týraly QazAqparat tilshisi Senattyń baspasóz qyzmetine silteme jasap habarlaıdy.

Senator Muhtar Jumaǵazıevtiń aıtýynsha, bul qujat qazaqstandyq asyl tuqymdy ónimniń básekege qabilettiligin arttyrady jáne ózara saýdadaǵy kedergilerdi joıady. Bul mal sharýashylyǵy naryǵynyń damýyna oń áser etedi degen sóz.

«Kelisim asyl tuqymdy mal sharýashylyǵy salasyn jetildirýge, onyń ınnovatsııalyq damýy úshin quqyqtyq negiz qalaýǵa, mal sharýashylyǵy ónimderiniń sapasyn arttyrýǵa, sondaı-aq genomdyq retteýdi qoldaný arqyly veterınarlyq qaýipsizdikti qamtamasyz etýge múmkindik beredi» - dedi senator Muhtar Jumaǵazıev.

Kezdesýge sonymen qatar aýyl sharýashylyǵy mınıstriniń orynbasary Rústem Qurmanov qatysty.

Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary zań jobasyn Palatanyń qaraýyna jiberýdi uıǵardy.