Senatorlar Qostanaı oblysynyń sharýalarymen kezdesti

QOSTANAI. QazAqparat - Senatorlar Jeńis Nurǵalıev pen Sergeı Karplıýk Qostanaı oblysyna sapary barysynda agrarlyq kásiporyn qyzmetkerlerimen kezdesip, aýyl sharýashylyǵynyń problemalaryn talqylady. Bul týraly QazAqparat palatanyń baspasóz qyzmetine silteme jasap habarlaıdy.

Atalǵan sharýashylyqta iri qara mal baǵylady, sondaı-aq dándi jáne burshaq tuqymdas daqyldardy ósirýmen aınalysady.

Kezdesý barysynda sýbsıdııa alý, bilikti kadrlardyń jetispeýshiligi jáne olarǵa turǵyn úıdiń joqtyǵy týraly máseleler kóterildi. Agrarshylar bul máselelerdiń bárin memlekettik deńgeıde qarastyryp, sheshý qajet ekenin atap ótti. Senatorlar sondaı-aq aýyl turǵyndarynyń áleýmettik jaǵdaıyna, aýylda ınfraqurylymnyń bolýy men Qostanaı aýdanynda «Aýyl-el besigi» baǵdarlamasynyń iske asý barysyna nazar aýdardy.

«Biz olardy tolǵandyratyn ózekti máseleler boıynsha aýyl turǵyndarynyń usynystary men pikirlerin qaraıtyn bolamyz. Keıinnen barlyq máseleler men eskertýlerdi Parlamentte talqylap, olardy sheshý joldaryn izdestiremiz», - dep atap ótti senator Jeńis Nurǵalıev.

Kezdesýge qatysýshylar elimiz Prezıdenti Qasym-Jomart Toqaevtyń Qazaqstan halqyna Joldaýyn talqylady. Senatorlar jańa Qazaqstandy qurý – jalpyulttyq mindet ekenin atap ótti.

«Memleket basshysy qoǵamdyq-saıası saladaǵy júıeli reformalar toptamasyn usyndy. Saılaý júıesin, Parlament pen máslıhattardy túbegeıli qaıta qurý kútip tur. Árıne, bul partııalardy tirkeý rásimin aıtarlyqtaı jeńildetýmen qatar, saıasatqa halyqtyń bedeli men senimin paıdalanatyn jańa tulǵalardyń kelýine yqpal etetin bolady. Bul depýtattardyń saılaýshylar aldyndaǵy jeke jaýapkershiligin arttyrady», - dedi Jeńis Nurǵalıev.

Senatorlar óńirge sapary barysynda Ozernyı aýylyna baryp, kóktemgi dala jumystaryna daıyndyq barysymen tanysty.