Senatorlar qorǵanys ónerkásibi keshenin jekeshelendirýge jol bermeýge shaqyrdy

ASTANA. QazAqparat - Qorǵanys ónerkásibi keshenindegi kásiporyndardy jekeshelendirý memleket úshin qaýipti saldarǵa ákelýi múmkin. Senator Gennadıı Shıpovskıh óziniń depýtattyq saýalynda osy máselege oraı pikirin aıtty, dep habarlaıdy QazAqparat tilshisi.

Depýtat táýelsizdik jyldarynda osy mańyzdy salada birqatar ózgerister oryn alǵanyn atap ótti. Qorǵanys ónerkásibi keshenine jatatyn kásiporyndardyń kópshiligi búginde jekeshelenip ketken jáne jekemenshikte qalyp otyr.

«Qazirgi kezde otandyq qorǵanys ónerkásibi kesheniniń ózegi sanalatyn «Qazaqstan ınjınırıng» ulttyq kompanııasy» aktsıonerlik qoǵamy aktıvteriniń qurylymyna 15 kásiporyn kirip tur. Onyń ishinde «Jekeshelendirýdiń 2021-2025 jyldarǵa arnalǵan keıbir máseleleri týraly» Úkimettiń qaýlysyna sáıkes, 4 aktıvti satý kózdelip otyr, sonyń bireýi «Tynys» aktsıonerlik qoǵamy bıyl mamyr aıynda satylyp ketti», - dedi senator Úkimet basshysy Álıhan Smaıylovtyń atyna joldaǵan saýalynda.

Depýtat ol satylǵannan keıin «Qazaqstan ınjınırıngi» qarýly kúshterdi barynsha suranysy bar qarý-jaraqpen jáne áskerı tehnıkamen tolyq qamtamasyz ete almaı qalýy múmkin ekenin aıtty.

«Bul saladaǵy kásiporyndardy jekeshelendirýden tıisti qaýip bar. ıAǵnı memleket jaǵynan jekemenshik qorǵanys ónerkásibin qadaǵalaý múmkindiginiń azaıýy, qorǵanys ónerkásibine sheteldik ınvestorlardyń qatysýy bolashaqta onyń qyzmetin memleketke qarsy paıdalanylmaıtyna kepildiktiń bolmaýy, soǵys jaǵdaıynda qorǵanys ónerkásibinen aıyrylyp qalý jaǵdaıyna ákelýi múmkin. Bul rette jekeshelengen múlik tistegenniń aýyzynda, ustaǵannyń qolynda ketpes úshin Qazaqstan Respýblıkasynyń ulttyq qaýipsizdiginiń jaı-kúıine áser etetin obektilerdi jekeshelendirýge jol berilmeýin talap etemiz»,-dedi senator.