Senatorlar Kedendik baqylaý komıtetiniń monıtorıngtik ortalyǵynda boldy

ASTANA. 24 qańtar QazAqparat - Búgin QR Parlamenti Senatynyń Halyqaralyq qatynastar, qorǵanys jáne qaýipsizdik jónindegi komıtetiniń depýtattary QR Qarjy mınıstrliginiń Kedendik baqylaý komıetiniń monıtorıng ortalyǵy ashylýyna qatysty.

Palatanyń baspasóz qyzmetinen habarlaýynsha, kezdesý barysynda senatorlarǵa respýblıka shekarasynda keden organdary qyzmetin monıtorıngteý jónindegi jedel basqarý ortalyǵynyń keıbir múmkindikteri, sondaı-aq buzýshylyqtar oryn alǵan jaǵdaıda keden bekettterinen telefon shalatyn tegin call-ortalyǵy kórsetildi.

Senattyń salalyq komıtetiniń tóraǵasy Ikram Adyrbekovtyń atap ótýinshe, kedendik qyzmetti halyqaralyq standarttarǵa sáıkes reformalaý boıynsha belsendi jumys 2008 jyldan beri júrgizilýde. «Kedendik baqylaý komıtetiniń zamanaýı monıtorıngtik ortalyǵyn qurý bizdiń elimizdińKedendik odaq aıasyna, sondaı-aq DSU-ǵa kirýine daıyndyǵynyń joǵary deńgeıin kórsetýde», - dedi senator.

Kedendik baqylaý komıtetiniń tóraǵasy Májıt Esenbaev monıtorıngtik ortalyqty qurý kezeńderi týraly egjeı-tegjeıli baıandap berdi. Onlaın rejıminde ol depýtattarǵa kedendik qosyndar men ótkizý pýnkterinde qurylǵan beınebaqylaýdyń jedel ortalyǵynyń jumysyn kórsetti. Budan basqa, ol kedendik organdar qyzmetiniń reglamentiniń buzýshylyǵy boıynsha kelip túsetin barlyq shaǵymdar tirkelip, óndeletin call-ortalyqtyń jumysyna nazar aýdartty.

Senatorlar kedendik qyzmetti damytý, esirtki aǵynyna qarsy kúres salasyndaǵy jumys, sondaı-aq kedendik qosyndar men olardyń zamanaýı kommýnıkatsııa quraldarymen jabdyqtalýy jaıynda tanys boldy..

Kezdesýge sondaı-aq senatorlar Ádil Ahmetov, Muhtar Altynbaev, Oralbaı Ábdikárimov, Ǵanı Qasymov, Sergeı Kýlagın qatysty.