Senatorlar Qazaqstannyń syrtqy saıasaty máselelerin talqylady

NUR-SULTAN. QazAqparat - Búgin Senatta Qazaqstan Respýblıkasynyń shet memlekettermen jáne halyqaralyq uıymdarmen qatynastaryndaǵy syrtqy saıası jáne ekonomıkalyq biryńǵaı baǵyty men ınvestıtsııalyq saıasatty qamtamasyz etý máseleleri talqylandy, dep habarlaıdy QazAqparat.

Senattyń baspasóz qyzmetinen málim etkendeı, palata tóraǵasynyń orynbasary Asqar Shákirovtiń tóraǵalyq etýimen Senattyń Halyqaralyq qatynastar, qorǵanys jáne qaýipsizdik komıteti músheleri Syrtqy ister mınıstriniń orynbasary Aqan Rahmetýllınmen kezdesti.

«Búginde álemdegi geosaıası ahýaldyń kúrt ózgerýine jáne buryn-sońdy bolmaǵan qaýip-qaterge baılanysty Memleket basshysynyń syrtqy ister mınıstrligi alqasynyń keńeıtilgen otyrysynda, sondaı-aq onyń sońǵy ýaqyttaǵy baǵdarlamalyq sózderinde alǵa qoıǵan mindetterdi buljytpaı oryndaýy asa mańyzdy bolyp otyr», - dep atap ótti A.Shákirov.

Syrtqy ister mınıstriniń orynbasary Aqan Rahmetýllın senatorlardy syrtqy saıasattyń negizgi baǵytymen jáne maqsat-mindetterimen, sondaı-aq eldiń qazirgi basymdyqtarymen tanystyrdy.

A.Rahmetýllın atap ótkendeı, táýelsizdik tańynda qalanǵan Qazaqstannyń saıası baǵytynyń bazalyq qaǵıdatyndaǵy syrtqy saıasattyń sabaqtastyǵy saqtalyp keledi jáne tıimdiligi ýaqytpen dáleldengen teńgerimdilik, pragmatızm jáne ulttyq múddelerdi qorǵaýǵa negizdelip otyr.

Táýelsizdikti, halyqaralyq jáne óńirlik yntymaqtastyq pen qaýipsizdikti nyǵaıtýǵa baǵyttalǵan daǵdyly syrtqy saıası baǵyt ta damýdyń ekonomıkalyq vektoryna baǵyttalatyn bolady. Bul el ekonomıkasyna sheteldik tikeleı ınvestıtsııa tartý, sondaı-aq tarıftik jáne tarıftik emes kedergilerdi azaıtý arqyly qazaqstandyq eksportqa syrtqy naryqty keńeıtý sharalaryn kúsheıtýge múmkindik beredi.

Komıtet tóraǵasy Muhtar Qul-Muhammed kezdesýdi qorytyndylaı kelip, pandemııadan keıingi qalpyna keltirý problemalary Qazaqstannyń aldyna jańa maqsattar men mindetter qoıatynyn atap ótti. Bul kópjaqty jáne ekijaqty dıplomatııany damytý men jahandyq ekonomıkalyq daǵdarystyń saldaryn eńserýge qatysty bolyp otyr. Ol úshin qabyldanatyn sheshimniń jedeldigi, tıimdiligi jáne resýrstardy tıisinshe paıdalaný mańyzdy bolady.

Senatorlar otyrys barysynda syrtqy saıasattyń ózekti máselelerin, onyń ishinde halyqaralyq uıymdarda qazaqstandyq kadrlardyń ornyn basý, halyqaralyq sharttarǵa monıtorıng jasaý máselelerin kóterdi.