Senatorlar kásiptik-tehnıkalyq kolledjderdiń qyzmetimen tanysty

<p>ASTANA.KAZINFORM &mdash; Senattyń Áleýmettik-mádenı damý jáne ǵylym komıtetiniń depýtattary &laquo;Eńbek adamy - ulttyq ekonomıkanyń ósýi men ulttyń órkendeýiniń negizi&raquo; taqyrybyndaǵy parlamenttik tyńdaýǵa daıyndyq aıasynda astanalyq &laquo;Kólik jáne kommýnıkatsııa joǵary kolledji&raquo; men &laquo;Tehnologııa kolledjinde&raquo; boldy, sondaı-aq &laquo;Qazaqstan temir joly&raquo; kompanııasynyń óndiris nysandaryn aralady. Bul týraly Senattyń Baspasóz qyzmeti málim etti.</p>

Komıtet tóraǵasy Nurtóre Júsip ekonomıkany damytý jáne ulttyń órkendeýi úshin jumysshy mamandyqtarynyń mártebesin arttyrýdyń mańyzdylyǵyn atap ótti. Ol kólik, energetıka jáne ónerkásip sııaqty ekonomıkanyń negizgi salalarynyń tıimdi jumys isteýi joǵary bilikti kadrlarǵa baılanysty ekenin aıta kelip, Qazaqstannyń eńbek áleýetin odan ári damytý úshin bilim berý, oqý baǵdarlamalaryn jańǵyrtý jáne qyzmetkerlerdiń biliktiligin arttyrý máselelerine nazar aýdarý qajet ekenin jetkizdi.

Foto: Senattyń Baspasóz qyzmeti

— Bilim berý mekemeleri men óndiristik kompanııalardyń ujymdary jáne memlekettik bıliktiń úılesimdi jumysy Qazaqstannyń órkendeýine negiz bolatyn qýatty eńbek áleýetin qalyptastyrýǵa múmkindik beredi. Sondaı-aq jastarǵa jumys oryndaryn ashýǵa jáne eńbekshilerdi áleýmettik qorǵaýdy damytýǵa yqpal etetin bolady, — dep atap ótti senator.

Depýtattar sapar barysynda oqý baǵdarlamalarymen jáne stýdentterdi mashına jasaý, energetıka, kólik jáne aqparattyq tehnologııa sııaqty salalarda oqytý tájirıbesimen tanysty. Oqý josparlaryn jańǵyrtý jáne jańa tehnologııany oqytý úderisine ıntegratsııalaýdyń, sondaı-aq oqytýshylardyń biliktiligin arttyrýdyń mańyzdylyǵyna erekshe nazar aýdaryldy.

Foto: Senattyń Baspasóz qyzmeti

QTJ basshylyǵymen jáne qyzmetkerlerimen kezdesýlerde ınfraqurylymdy jańǵyrtý, jańa tehnologııany engizý jáne temirjolda qaýipsizdikti arttyrý máseleleri talqylandy. Bul sharalar qyzmet kórsetý sapasyn arttyrý men jumyspen qamtýdyń ósýine jáne elimizdegi áleýmettik-ekonomıkalyq jaǵdaıdy jaqsartýǵa yqpal etetin jańa jumys oryndaryn ashýǵa baǵyttalǵan.